Ана Крстаноска е млада и креативна жена, која стои зад еден од најубавите инстаграм-профили за храна кај нас – „Ана кичен корнер“ (ana_kitchen_corner).

Готвењето ѝ е вистинска пасија и хоби на кое му пристапува со голема љубов и посветеност.

– Спремањето храна го доживувам како мое хоби, кое го надополнувам со многу љубов и внимание секогаш кога сум во можност. Среќна сум кога им спремам нешто вкусно на моето семејство и моите пријатели и токму тоа ми ја полни душата со позитивна енергија – вели таа.

Денеска Ви го претставуваме нејзиниот рецепт за проја со интегрално брашно.

– Ова е мојот рецепт за премека и поздрава верзија на проја, која може да ја консумирате без грижа на совест – фантазија, вели Крстаноска.

Потребни состојки:

• 2 чаши (од 200 мл) палента
• 1 чаша (од 200 мл) интегрално брашно
• 2 чаши (од 200 мл) кисела вода
• 100 мл масло
• 1 печиво
• Сол по вкус
• Сирење по желба
• Семки за посипување

Подготовка:

Најпрво, измешајте ги сувите состојки, па додајте ги течностите. Изматете ја смесата со миксер за да биде мазна. Откако ќе ја спремите, истурете половина од смесата врз подмачкан плех од 23 сантиметри.

Ставете дробено сирење по желба.

Потоа повторно ставете од смесата, посипете со семки и печете во загреана рерна на 200 степени, околу половина час.

На здравје!