Кучињата кои го нападнаа осумгодишното дете во скопската населба Пинтија се изолирани и ставени под ветеринарен надзор. Од Агенцијата за храна и ветеринарство информираат дека кучињата биле уредно идентификувани со микрочип. Официјален ветеринар ќе го испитува случајот и ќе врши проценка на околностите под кои се случил трагичниот настан.

Детето, кое живеело во соседната куќа, двете кучиња го нападнале вчера попладнето, а тоа веднаш било пренесено во Градската болница, но за жал им подлегнало на повредите.

Двете кучиња од расата англиски мастиф се регистрирани и во Кинолошкиот сојуз. Едното е донесено од Србија, а другото од Белорусија. Оттаму велат дека се работи за кучиња со поголем раст, кои учествувале на изложби и кои се добро одгледани и социјализирани.

Со контролата ќе се испитува и дали сопственикот на кучињата ги испочитувал одредбите од законите за ветеринарно здравство, за идентификација и регистрација на животните и за здравствената заштита и благосостојба, односно дали се испочитувани условите пропишани во актуелната Годишна наредба за здравствена заштита на животните, условите за држење на кучињата од страна на сопственикот итн. Согласно Законот, се дава налог кучињата да се стават под официјален надзор за болеста беснло од страна на ветеринар за период од 15 дена, а по завршувањето на опсервацијата се издава сертификат за надзор на беснило со кој се потврдува здравствениот статус на животните во однос на болеста.

Се работи за кучиња од поголем раст, меѓутоа напоменувам дека кучињата учествувале на изложби што значи дека се социјализирани затоа што на изложби за убавина мора кучињата да бидат добро одгледани и социјализирани со други животни и со луѓе, вели претседателот на Кинолошкиот сојуз, Јордан Христовски.

Тој додава дека Кинолошкиот сојуз нема информации околу тоа дали сопственикот чувал други кучиња.

Христовски изрази сочувство до семејството на детето и апелира до јавноста да се воздржи од паушални изјави.

Сочувство на фамилијата на детето за немилиот настан. Апелирам до јавноста да се воздржи од паушални коментари и да остават на надлежните институции да изработат детален извештај за причините под кои се случи настанот, вели Христовски.

Од „Анима мунди“ велат дека ќе се произнесат доколку проценат дека има основ за тоа по официјалните ставови на институциите.

Согласно одредбите на Законот за заштита и благосостојба на животните во поглед на држење на опасни кучиња, сопственикот или одговорното лице за опасно куче треба да обезбеди услови за држење на животното соодветно за расата, потребите и карактеристичното однесување, при што вклучително треба кучето да го чува во заграден простор или врзано и при движење кучето да го врзе на поводник и да му стави заштитна маска. Опасните кучиња при движење треба да бидат придружувани од полнолетно лице.

Сопствениците на кучиња треба на влезната врата во дворот на видливо место да постават табла со која недвосмислено се укажува на присуство на куче, без разлика дали кучето или кучињата се опасни или не.