Жена е убиена, а повеќе луѓе се ранети и се борат за живот во инцидент со пукање во белградската населба Вишњичка Бања. Целиот регион е под полициска опсада, а се бараат напаѓачите, кои излегле од бело комбе и почнале да пукаат кон луѓе во кафе-бар, објави „НоваС“.

Според неофицијалните информации кои ги објавија српските медиуми, станува збор за кафе-бар во кој често се собираат навивачи, па не е исклучено мотивот за нападот да е нетрпеливост меѓу навивачки групи, но тоа засега не е потврдено. Во близина на кафулето имало и автобуска постојка на која во тој момент имало десетина деца, пишуваат медиумите.

„Едно лице со тешки повреди е веднаш испратено во операциона сала под мерки за реанимација, додека другите лица моментално се во реанимација, а се врши дијагностика и третман на повредите“, соопшти Ургентниот центар околу состојбата во која се наоѓаат повредените.

По напаѓачите, кои избегале со комбето веднаш по нападот, интензивно се трага во повеќе белградски населби, соопшти полицијата.