Директорот на Државниот архив, д-р Емил Крстески, на 26 и 27 ноември учествуваше на виртуелна zoom-конференција на Генералното собрание на Меѓународниот центар за архивско истражување ИКАРУС (International centre for archival research – ICARUS) со која паралелно се одржа и 25. состанок на оваа меѓународна асоцијација.

ИКАРУС (www.icar-us.eu) е заедница на повеќе од 180 архивски и научни институции од 34 европски земји и од Канада и САД, којашто нуди интердисциплинарна платформа за архивските, истражувачките, образовните и културните институции, со посебен акцент врз општествените и технолошките предизвици на архивите во „дигиталното време“.

На Генералното собрание, меѓу другото, беше презентирана предлог-стратегијата за натамошниот развој и активностите на оваа меѓународна архивска организација, под наслов „Агенда 2023“. Во тие рамки се дефинирани главните цели на ИКАРУС, предизвиците со кои се соочува оваа организација во текот на своето работење. На Генералното собрание на ИКАРУС се направи и анализа на програмите и проектите на ниво на Европа, преку кои се финансираат активностите поврзани со културното наследство.

За директорот на Државниот архив, д-р Емил Крстески, меѓународната соработка на институцијата останува приоритет преку кој ќе се наоѓаат нови начини на соработка, вмрежување, професионална поддршка и развој на нови едукативни програми.