Сопствениците на дивата депонија која изгоре пред три недели во скопското село Визбегово, ќе одговараат за загрозување на животната средина и природата со отпад од член 230 од Кривичниот законик.

По преземените дејствија, по наредба на јавен обвинител, полицијата денеска поднесе кривична пријава против сопственичката, Маја Каранакова и против неформалниот сопственик на правното лице од Шуто Оризари, Александар Николчев. Двајцата претходно беа осудени на условна казна поради нападот врз новинарот и снимателот на телевизијата „Алсат“.

„Тие подолг временски период, спротивно на законските одредби од Законот за управување со отпад и спротивно на прописите за заштита на животната средина, складирале поголемо количество отпадно железо, електронски отпад, делови од стари автомобили, шасии од стари отпадни возила и друго на локација за која немале соодветна дозвола за управување со отпад.

На 9 јули, на локацијата бил предизвикан неконтролиран пожар на целата маса од складираниот отпаден материјал, а поради обемот и опасноста пожарот не можел веднаш да биде ставен под контрола. При согорувањето на отпадниот материјал биле испуштени чад, пепел и штетни гасови во амбиенталниот воздух и била предизвикана опасност за животот и здравјето на луѓето од поголеми размери.

„По барање на јавниот обвинител, непосредно по настанот, Единицата за атомска, биолошка и хемиска одбрана на Армијата изврши мерења и детекција на хемиска и токсична индустриска контаминација при што утврди зголемено ниво на загадување. Во текот на предистражната постапка, Единицата за економски и компјутерски криминал на СВР Скопје веќе презеде голем број дејствија по наредба на јавниот обвинител, кои вклучуваат обезбедување на целокупната документација за работата на правниот субјект и на други докази. Вонреден инспекциски надзор на локацијата изврши и Државниот инспекторат за животна средина, при што беа констатирани неправилностите во работата и записникот беше доставен до обвинителството. Надлежниот јавен обвинител во следниот период ќе продолжи да презема дејствија, при што ќе изврши распити на повеќе лица и ќе нареди соодветно вештачење за целосно испитување на настанот“, велат од Обвинителството.