Данскиот репрезентативец Кристијан Ериксен кариерата ќе ја продолжи во Манчестер јунајтед, откако денеска ги договори сите детали со „црвените ѓаволи“.

Според Би-Би-Си, Ериксен би требало да потпише тригодишен договор со Јунајтед, но откако ќе ги помине лекарските прегледи.

Данецот во Јунајтед доаѓа на инсистирање на новиот менаџер Ерик тен Хаг и тоа како слободен играч откако му истече договорот со Брентфорд.

Кристијан Ериксен на 21 декември го раскина договорот со Интер откако не успеа да добие лекарска дозвола да игра во Италија. Фудбалерот за време на Европското првенство, минатото лето доживеа срцев удар и му беше спасен животот во последен момент, а потоа му беше вграден дефибрилатор кој му ја регулира работата на срцето.

По раскинот на договорот со Интер, Ериксен откако ги мина лекарските прегледи и доби дозвола од специјална медицинска комисија, во јануари потпиша за Брентфорд и со своите игри ги воодушеви фановите и експертите.

По завршување на сезоната, Ериксен доби неколку понуди, најсериозни беа тие на Тотенхен и на Манчестер јунајтед, а Данецот се одлучи кариерата да ја продолжи на „Олд трафорд“.

Покрај Брентфорд и Интер, Кристијан Еиксен има настапувано и за Тотенхем и Ајакс.