Руското Министерство за финансии ѝ предложи на владата нацрт-буџет за 2026 година и плански период 2027-2028 година, кој предвидува зголемување на стапката на данокот на додадена вредност (ДДВ) од сегашните 20% на 22%, објавува „Москва тајмс“. Средствата собрани со оваа мерка се наменети за финансирање на одбраната и безбедноста, соопшти Министерството во официјално соопштение.

Преференцијалната стапка на ДДВ од 10% ќе остане на сила за сите општествено значајни производи како што се храна, лекови, детски производи и книги.

Приватизација на најголемите државни компании

Покрај зголемувањето на ДДВ, министерството предложи и укинување на привременото олеснување од ковид-19 за премиите за осигурување, проширување на опфатот на даночните обврзници за ДДВ според поедноставениот режим и воведување данок на игри на среќа – 5% на прифатени облози и 25% на профитот на обложувалниците.

Доколку предлозите бидат усвоени, измените на Законот за буџет и Даночниот законик ќе стапат во сила на 1 јануари 2026 година, според „Москва тајмс“.

Приходите од нафта и гас ќе се намалат за 20,2%

Предлогот за зголемување на ДДВ доаѓа во услови на растечки буџетски дефицит кој достигна рекордни 4,19 трилиони рубли (42,43 милијарди евра) за периодот јануари-август 2025 година, или 1,9% од БДП, во споредба со првичната прогноза од 1,17 трилиони рубли (11,85 милијарди евра) или 0,5% од БДП.

Падот од 20,2% на приходите од нафта и гас и зголемувањето на расходите за 21,1% поради војната во Украина се главните причини за влошувањето на буџетската состојба. Владата сега бара начини да го покрие дефицитот помеѓу „лошите и многу лошите“ опции, пишува „Ројтерс“.

ДДВ е клучен данок за рускиот буџет и во 2024 година учествуваше со речиси 37% од вкупните федерални приходи, или 13,5 трилиони рубли (136,76 милијарди евра). Последното зголемување на ДДВ беше во 2019 година, од 18% на 20%.

Според анализата на The Bell, зголемувањето на ДДВ од 2 процентни поени би можело да генерира дополнителни 0,5% од БДП, или околу 1 трилион рубли (10,13 милијарди евра) годишно. Рускиот сојуз на индустријалци и претприемачи предупреди дека зголемувањето на цените ќе следи по зголемувањето на ДДВ, што дополнително ќе ја зголеми инфлацијата и ќе го забави економскиот раст.