Мировните преговори со Украина, предложени од рускиот претседател Владимир Путин, ќе го вклучат и нацрт-договорот меѓу двете земји од 2022 година, кој беше напуштен, како и фактот дека Русија контролира речиси една петтина од територијата на Украина, објави денес Кремљ. Владимир Путин предложи одржување директни преговори со Украина во Истанбул, чија цел е постигнување траен мир и завршување на војната.

Украинскиот претседател Володимир Зеленски ја поздрави иницијативата, велејќи дека Киев е подготвен за разговори, но дека Москва прво мора да се согласи на итен прекин на огнот. Неколку дена по целосната инвазија на Русија врз Украина во февруари 2022 година, Русија и Украина започнаа разговори во Белорусија, кои подоцна се преместија во Истанбул. Нацрт-договорот (Истанбулско коминике) договорен во тој град беше поставен како рамка за можно решение.

Разговорите прекинаа во мај истата година, но руските претставници тврдат дека може да се постигне решение според тој нацрт. Стив Виткоф, специјалниот претставник на американскиот претседател Доналд Трамп, исто така го спомена нацрт-договорот од 2022 година како можен водич за иден мир.

По изјавата на Путин утрово, советникот за надворешна политика на Кремљ, Јуриј Ушаков, им рече на новинарите дека преговорите ќе го земат предвид и нацрт-договорот што беше отфрлен во 2022 година, како и моменталната ситуација на терен.

Според нацрт-документот, чија копија ја прочитаа новинарите на Ројтерс, Украина би се согласила на трајна неутралност во замена за меѓународни безбедносни гаранции од петте постојани членки на Советот за безбедност на ОН: Велика Британија, Кина, Франција, Русија и САД, како и други земји, вклучувајќи ги Белорусија, Канада, Германија, Израел, Полска и Турција.

Всушност, Украина привремено се согласи на ненуклеарна неутралност и да не биде членка на воениот сојуз на НАТО, во замена за безбедносна гаранција која, во случај на руска инвазија, би ги обврзала САД и нивните сојузници директно да се борат против Русија.

Прашањето за територијата, во нацрт-договорот од 2022 година, беше второстепено во однос на безбедносната гаранција – што дипломатите од двете страни го сметаа за убедливо најголема пречка за мир.

По инвазијата, Украина сакаше да ја гарантира својата безбедност, но САД и нивните сојузници беа внимателни да не се вклучат во евентуална идна војна со Русија.