Кремљ денес ги обвини европските земји за контрадикторни и конфронтирачки изјави, откако европските лидери го поддржаа американскиот план за 30-дневно примирје во Украина и ѝ се заканија на Русија со дополнителни санкции доколку не се согласи на договор за прекин на непријателствата.

„Слушнавме многу контрадикторни изјави од Европа. Тие се повеќе конфронтациски по природа отколку што имаат за цел да ги оживеат нашите односи. Ништо повеќе“, изјави портпаролот на Кремљ, Дмитриј Песков , пред новинарите, пренесува Ројтерс.

Песков рече дека рускиот претседател Владимир Путин постојано повторувал дека е подготвен за контакти со сите.

„Тој е отворен за интеракција, за дијалог со сите лидери до степен до кој тие се подготвени за тоа“, рече Песков.

Францускиот претседател Емануел Макрон, британскиот премиер Кир Стармер, германскиот канцелар Фридрих Мерц и полскиот премиер Доналд Туск, на кои во Киев домаќин им е украинскиот претседател Володимир Зеленски, ја повикаа Русија на безусловно 30-дневно примирје, откако за тоа разговараа по телефон со американскиот претседател Доналд Трамп.

„Сите ние овде, заедно со САД, го критикуваме Путин. Ако тој е сериозен во врска со мирот, тогаш има можност да го покаже тоа сега“, рече Стармер.

Германскиот канцелар изјави дека ќе следат уште построги санкции доколку Русија го отфрли примирјето, а на Украина и понатаму ќе ѝ се пружа голема помош – политичка, финансиска и воена.

Макрон изјави дека нов пакет санкции против Москва може да биде усвоен за неколку дена ако го отфрли предлогот за 30-дневно примирје.