Уредувањето на ентериер е спој на уметност и наука при што се креираат функционални и естетски привлечни внатрешни простори. А, при уредувањето на нашиот дом, неизбежни се и декоративните предмети што внесуваат топлина и шарм во секое катче од домот.

Љубовта кон уметноста и желбата за добро уреден дом секојдневно ја мотивираат Силвана Аврамовска Софронијоска да изработува уникатни декоративни предмети од гипс. Иако нејзиниот мал бизнис наречен „Катче“ го започнала од неодамна, таа веќе има израдувано голем број клиенти и украсено многу домови со своите рачни изработки.

Силвана, кога кај Вас се роди љубовта кон уметноста и креативната работа?

– Љубовта кон уметноста и креативната работа се роди уште рано, уште во моето детство. Отсекогаш ме фасцинираше како од обични материјали – хартија, глина или бои може да се создаде нешто толку уникатно и лично. Се сеќавам на миговите кога со часови цртав, сликав и правев украси, дури и кога другите деца си играа надвор. За мене, тоа беше мојот начин да раскажам приказна или едноставно да создадам нешто убаво што ќе го споделам со другите. Годините минуваа, но мојата страст кон рачно изработените предмети остана.

Како дојдовте до идејата да изработувате декоративни предмети од гипс?

– Кога првпат се сретнав со гипсот, беше како да најдов совршен медиум за изразување на мојата креативност. Ми се допадна идејата дека од нешто толку обично може да се создадат уникатни детали што ќе внесат топлина и личен печат во секој дом. Најголем поттик за идејата дојде кога на моите пријатели им подарив рачно изработени гипсени украси. Нивните реакции беа толку топли и искрени што тоа ме охрабри да размислувам за ова како можност за бизнис. Така започна мојата приказна, како обична љубов кон креативноста, која се претвори во страст, и на крај, во „Катче“, моето мало место каде што уметноста и животот се спојуваат.

Каде ја црпите инспирацијата за дизајнот на Вашите рачни изработки и дали прифаќате сугестии од клиентите?

– Инспирацијата за дизајните на рачните изработки ја црпам од секојдневниот живот и од специјални настани или сезони, на пример празнични декорации за Божиќ, романтични детали за свадба или свеќници за слави. Сакам да создавам предмети што носат посебна порака и се вклопуваат во моментите што луѓето ги слават. Што се однесува до сугестиите од клиенти – апсолутно ги прифаќам. Кога клиент ќе дојде со своја замисла или желба, тоа за мене е предизвик. Сакам да создавам нешта што ќе имаат лична вредност за клиентите, било да е тоа уникатен подарок, декорација за нивниот дом или предмет со посебно значење. Всушност, некои од најубавите изработки што сум ги направила се родија токму од идеи и сугестии на клиенти. Нивните приказни и замисли ми помагаат да ја проширувам својата креативност и да создадам нешто што ќе ги направи навистина среќни.

Вашиот асортиман на рачни изработки од гипс е разновиден. Раскажете ни како изгледа и колку трае процесот за да изработите, на пример, една вазна?

– Процесот на изработка на една гипсена вазна конкретно е комбинација од креативност, прецизност и трпение. Секој чекор е важен за финалниот резултат, а целиот процес може да трае од неколку часа до неколку денови, во зависност од сложеноста на дизајнот и времето на сушење. Првиот чекор е подготовка на материјалите, односно, гипс во прав, силиконски калапи, вода, алатки како шпатула, четки и шмиргла за завршна обработка. Потоа гипсот се меша со вода во сооднос што овозможува лесно истурање, но и доволна густина за да не се создаваат меурчиња. Ова е критичен момент бидејќи структурата на вазната зависи од правилното мешање. Вака спремната смеса се истура во калап и нежно се протресува за да се избегнат воздушни меурчиња. Гипсот потоа мора целосно да се исуши и да се стврдне. Времето на сушење зависи од дебелината на вазната и влажноста на воздухот. Во оваа фаза, трпението е клучно, односно доколку предвремено се извади од калапот, вазната може да се оштети. Кога гипсот е целосно стврднат, внимателно се вади од калапот, од каде започнува фазата на обработка. Се мазнат сите груби рабови со шмиргла и се додаваат детали. По желба на клиентот, вазната може да се обои со акрилни бои. Понекогаш додавам и финален лак за заштита и сјај, за што дополнително се додава време за сушење. Процесот може да изгледа долг, но тоа е дел од магијата на рачната изработка.

Со која рачна изработка особено се гордеете? И кој дизајн Ви одземал најмногу време при изработката?

– Најмногу се гордеам со мојата новогодишна колекција, за која ми помогна и мојата сестра. Навистина вложив многу труд и време во создавање на уникатни производи за празниците. Највеќе време ми одземаат производите што треба да се бојат со акрилни бои, зошто процесот се повторува неколку пати, додека не се добие соодветната боја, а настојувам на тоа да изгледаат колку можат пореалистични сите предмети.

Според Вашето искуство, колку рачните изработки се ценети кај нас? И дали може да се живее од креативна работа?

– Рачните изработки кај нас во последно време добиваат сѐ поголемо внимание, особено поради фактот што сега луѓето ја ценат креативноста, уметноста и трудот вложен во секое парче. Да, може да се живее од креативна работа само доколку си упорен, посветен и истраен. Креативните изработки нудат многу можности, но истовремено си доаѓаат и предизвици. Начинот да стигнеш до успех е да се обидуваш постојано и никогаш да не се откажеш.

Силвана ќе подари декоративни предмети од гипс од својот асортиман на двајца читатели на „Слободен печат“.

Доколку ви се допадна нејзината приказна и сакате да добиете подарок, пријавете се на имејл-адресата [email protected], со назнака „За подарок“, каде што ќе ни ги пратите вашите лични податоци – име, презиме, телефонски број и адреса на живеење. Со среќа!