Неформалното Здружение на микро, мали и средни компании, кои се директно или индиректно вклучени во креативната индустрија, на прес-конференција одржана кај фонтаната во Градски парк испрати Барање за итни мерки за поддршка на претпријатијата од овие дејности погодени од состојбата со коронавирусот до Владата на Република Северна Македонија, односно до Кабинетот на претседателот на Владата задолжен за економски прашања и за координација со економските ресори.

Според здружението, со неработењето на околу 80 продукциски компании директно или индиректно се засегнати голем број уметници од различни профили – актери, музичари, фотографи, сликари, дизајнери, костимографи, сценографи, светло-мајстори, како и кастинг-агенции, печатници, кетеринг-служби, агенции за обезбедување, програмери, техничари, енергетичари, превозници, бравари, столари и многу други.

– Ние сме целосно погодени, бидејќи Уредбата за забрана на јавни собири стапи на сила на крајот на февруари, кога нашите фирми ставија клуч на врата. Оваа криза и предизвиците со кои се соочува нашата креативна индустрија е нешто што ниту може да се предвиди ниту да се согледаат последиците во овој момент. Со нашето неработење, освен ние како компании, се погодени и многу други сектори и физички лица, пред сѐ, креативни, културни работници и субјекти, велат од неформалното здружение.

На прашањето дали ќе користат некоја од економските мерки предложени од Владата, велат дека најголем дел од членовите на здружението се изјасниле дека нема да ги користат.

– Тие се недоволни, недоречени, со голем број ограничувачки фактори, неприменливи и премногу општи. Секоја гранка се соочува со тешкотии, но не сите на еднаков начин. Исто така, не секоја гранка ќе одбере ист пат за излез од оваа криза. Затоа сметаме дека ставањето во ист кош на сите компании е погрешен пристап.

Конкретно, ние сме без какви било приходи и без можност за дури и најмал обрт преку онлајн или шалтерска продажба. Свесни сме дека ние последни ќе добиеме дозвола да почнеме со работа и тоа во моментов е голема пречка за нас во проектирање некакви планови за излез од кризата. Ќе ја следиме состојбата и, секако, ќе реагираме соодветно во дадените моменти – изјавија од неформалното здружение, кое се планира да прерасне во комора на креативни индустрии.

Неформалното здружение го сочинуваат агенции за организирање настани, како концерти, манифестации, конференции, саеми, конгреси, промоции, корпоративни и други настани, а во моментов брои близу 80 компании што вработуваат повеќе од 400 вработени, иако, велат, реалната бројка е тројно поголема.

(Текстот е објавен во „Културен печат“ број 26, во печатеното издание на „Слободен печат“ на 10-12 април 2020)