Претседателот на ДПК Мемли Красниќи изјави дека никогаш немало поголема корупција на Косово отколку во владата на Курти, пренесува Клан Косова.

„Ако некогаш имало корупција на Косово, тоа е корупцијата која навлегла во порите на секоја институција и секое ниво на власт, но која има одредена пирамида. Таа е директно поврзана со владата и премиерот Курти“, рече Красниќи.

Тој додаде дека најголемата корупција е во областа на енергетиката, а дека „главен лик“ е амбасадорот на Косово во Хрватска, Мартин Беришај.

„Во центарот на приказната е амбасадорот на Косово во Хрватска, пријател на Албин Курти, Мартин Беришај. Криминалот и корупцијата направена во областа на енергетиката во оваа власт беше во такви размери што не сме ги виделе ниту во регионот. Мартин Беришај е точката на гравитација, центар на најголемиот корупциски и финансиски скандал во регионот, со седиште во Словенија и Србија“, рече Красниќи.

За инцидентот што се случи на седницата на Собранието на Косово на 13 јули, рече дека ова е првпат власта организирано да интервенира против пратениците.

„Дури и во најтемните денови на косовскиот парламентаризам,  движењето Самоопределување насилно ја прекина работата на народните избраници, фрлаше солзавец и ги напаѓаше министрите со шишиња и јајца, владините министри никогаш не реагираа“, рече Красниќи.

Според него, ДПК не го прифаќа предлогот на АБК за рушење на Владата, бидејќи се свесни дека немаат доволен број пратеници во Собранието.