Надбискупот од Кентербери го круниса кралот Чарлс III на церемонија во Лондон, ставајќи ја 360-годишната круна на Свети Едвард на неговата глава додека седеше на престолот од 14 век во Вестминстерската опатија. Потоа тој го поздрави народот од балконот на Бакингемската палата.

Церемонијата на крунисувањето на кралот Чарлс заврши со поздрави и мавтања од членовите на кралското семејство од балконот на Бакингемската палата. Десетици илјади луѓе се собраа пред палатата за да ја поздрават новата британска кралска двојка.

Илјадници луѓе ја следеа поворката додека се движеше кон Вестминстерската опатија, а претходно денеска неколку луѓе беа уапсени во близина на плоштадот Трафалгар, вклучувајќи ги и водачите на антимонархиската група Република.

Чарлс III е 40-тиот монарх што бил крунисан на ова место од 1066 година, а за време на церемонијата тој вети дека ќе го почитува законот за време на неговото владеење и дека ќе „негува средина во која луѓето од сите вери можат да живеат слободно“.