Македонската репрезентација одигра едно добро полувреме и тоа не беше доволно за победа во Талин, па Естонија запиша триумф со 84:65 и така ги згасна нашите надежи за пласман на Европското првенство.

Домаќините подобро го отворија натпреварот и во првата четвртина констатно Естонците беа во водство, иако нашиот селектор со право се пожали на грубата игра на домашните кошаркари врз нашите најдобри поединци Ти-Џеј Шортс и Ненад Димитријевиќ.

Токму тие двајца беа и најрасположени и не дозволуваа Естонија да се „одлепи“. По првиот период  Естонија водеше со 22:17.

Стартот од вториот период донесе подобра игра на нашите кошаркари, па така со една тројка на Шортс во 12. минута стигнавме и до израмнување (24-24). Набрзо потоа Шортс беше прецизен и од линијата за слободни фрлања за прво водство на Македонија во натпреварот (24-26).

Во минутите до крајот на првиот двете селекции се менуваа во водството, а на крајот Македонија со забивањето на Маслинко во последните секунди обезбеди водство со 38:39.

За жал добрата игра од тој втор период не успеавме да ја пренесеме и во второто полувреме. Естонците во третиот период ја направија клучната разлика со која подоцна само ја одржуваа. Во оваа третата четвртина Естонците и за првпат поведоа со двоцифрена разлика (58:48).

Македонија во последниот период влезе во осум негатива, но тука веќе стануваше јасно дека нема да можеме да победиме и да ги надополниме оние „плус пет“ на Естонија од Скопје. Така нашите кошаркари како и предвреме да се предадоа, па Естонија на крајот славеше и убедливо.

За три дена Македонија во Скопје ќе игра против Полска во последното коло, но и со победа во тој натпревар нема да имаме шанси за место на Евробаскетот.

Најефикасен во нашите редови беше Шортс со 21 поен и шест асистенции, 20 поени додаде Димитријевиќ,  додека Маслинко ја заврши средбата со 15.