Легендата на српската и европската кошарка, Милош Теодосиќ, денеска на 39 години и официјално стави крај на својата играчка кариера.

Со речиси три децении поминати во професионалната кошарка, Теодосиќ зад себе остава трага која ретко кој ќе може да ја повтори. Во текот на својата кариера носеше дресови на неколку европски гиганти, а две сезони настапуваше и во НБА лигата како член на Лос Анџелес Клиперс.

„Ви благодарам за 30 години заедничка борба, уживање, радост и тага. Дојде моментот да се простам од една фаза на мојата љубов кон магичната игра под обрачите. Имаше многу желба, борба, жртви. И трофеи и порази – сето тоа е дел од кошарката и животот. Не би менувал ништо – сè би направил исто“, напиша Теодосиќ во емотивната порака до фановите.

Последниот клуб во кариерата му беше Црвена Звезда, а претходно играше за Виртус Болоња, Борац Чачак, Олимпијакос, ЦСКА Москва и ФМП. клубот каде што и ги направи првите кошаркарски чекори.

На репрезентативен план најголемиот успех го оствари кога во 2014 година стигна до среброто на Светското првенство во Шпанија, а две години подоцна и до сребрен медал на Олимписките игри во Рио де Жанеиро. Теодосиќ се повлекува како еден од најхаризматичните и најкреативни плејмејкери што Европа ги имала во изминативе децении.