Серија на кражби се случуваат во уметничката галерија „Безистен” во Штип. Полицијата вчера на дело го фатила 26-годишниот С.Н. како ги краде оловните плочи од покривната конструкција на објектот.

Но, директорот на Заводот за заштита на споменици и Музеј на град-Штип, Митко Штерјов, вели дека кражбите на оловните плочи продолжиле и синоќа, кога се одземени уште шест.

-Една плоча тежи од 40 до 50 килограми, во континуитет неколку дена се крадат овие плочи од кровната конструкција, единствено за Нова година не забележавме кражба на плочите. Станува збор за штета од над 10.000 евра, вели Штерјов.

Крадецот пред два дена е фатен, качен на дрвени скали, како ги одзема плочите, а неговиот автомобил бил паркиран во непосредна близина. Штерјов се надева на соработка од граѓаните кои живеат во близина, но за да се заштити објектот од вакви дрски крадци, директорот најави поставување и на видеонадзор. Досега од кровната конструкција на уметничката галерија „Безистен” во Штип се украдени 26 оловни плочи. Инаку ваква кражба е регистрирана и пред две години, кога на лице месо се фатени двајца крадци.