Европските козметички компании бараат од Европската Унија да ја отстрани американската козметика од листата на потенцијални трговски одмазди. Стравуваат дека САД би можеле да возвратат со иста мерка и да го загрозат еден од највредните сектори во регионот. Николас Хиеронимус, извршен директор на „Лореал“, рече дека тој и сојузот од 15 лидери во индустријата за убавина ги предупредиле претставниците на ЕУ оваа недела дека таквиот потег ќе направи повеќе штета отколку корист, пишува Фајненшл тајмс, пренесува Јутарњи лист.хр.

Оваа реакција доаѓа откако минатата недела Европската Унија објави одговор на царините наметнати од американскиот претседател Доналд Трамп. Планираните мерки се однесуваат на увоз на челик и алуминиум и вклучуваат долг список на 99 страници на американски стоки кои би можеле да бидат предмет на царини почнувајќи од средината на април. Оваа листа вклучува и парфеми, шампони, производи за нега на кожа и шминка.

Покрај „Лореал“, против воведувањето тарифи за козметиката од САД се и германскиот Беирсдорф и швајцарскиот Гиваудан.

„Постојано им нагласувавме на европските претставници дека е грешка да се вклучат индустријата за убавина и козметика во таа листа. Ако сакаат да воведат тарифи, нека биде за категории кои се нето увозници, а не нето извозници. Оставете нè надвор, ценете го нашиот придонес во економијата и не создавајте проблеми таму каде што ги нема“, рече Винсент Ворнери, извршен директор на Беирспапер.

Според проценките на Oксфорд економикс, козметичката индустрија ѝ донела на европската економија околу 180 милијарди евра приход во 2023 година и дополнителни 71 милион евра преку даноци, а вработува околу два милиони луѓе. Европа е еден од најголемите извозници на производи за убавина и лична нега, со САД како клучен пазар за многу големи брендови.