Велика Британија повторно се соочи со нов раст на случаи со омикрон, а денеска забележа повеќе од 122.000 нови инфекции, што е нов рекорд од почетокот на пандемијата, пишува Гардијан.

Земјата, која е една од најтешко погодените од пандемијата во Европа, забележа 137 смртни случаи од коронавирусот во последните 24 часа, со што вкупниот број на починати во пандемијата се искачи на 147.857. Евидентирани се и 1.171 хоспитализации, што претставува нов раст на вакви случаи.

Засега Велс, Северна Ирска и Шкотска најавија зајакнување на ограничувањата по Божиќ. Во Англија, владата на Борис Џонсон чека и се потпира на студиите кои покажуваат дека ризикот од хоспитализација од омикрон е помал во споредба со досегашниот доминантен делта сој.