Истражните органи треба да одговорат дали новиот директор на АНБ Зарко Милошевски е поврзан со случаите „27 април“ и „Диво насеље“, како што наведува опозициската ВМРО-ДПМНЕ, изјави премиерот Димитар Ковачевски на новинарско прашање дали Милошевски е поврзан со тие случаи и дали треба да понесе одговорност.

-Милошевски е избран како професионалец кој што од 1997 година работи во службата и напредувал, посетувал бројни обуки кои се доминантно во САД и во Канада. За наводите кои ги дава опозицијата, тоа може да се провери од соодветни институции. Сметам дека опозицијата при назначување на секој функционер има напади, јас барем знам за што се мене ме напаѓаа, дури и мртви роднини ми споменуваа. Одговорот треба да го дадат соодветните служби кои се занимаваат со истраги ,а тие не се дел од Владата – изјави Ковачевски.

ВМРО-ДПМНЕ обвини дека власта молчи дека Милошевски се поврзува со „Диво насеље“, „27 април“ и дека е потписник на документот за македонското државјанство за рускиот олигарх Олександр Онишченко.