Двајца полицајци се хоспитализирани на Клиниката за токсикологија поради вдишување јаглерод моноксид при гаснењето на пожарот што попладнево избувна во близина на новоизградената детска градинка во дворот на основното училиште „Св. Климент Охридски“ во Бутел, информира градоначалникот на Општина Бутел, Дарко Костовски.

Тој упати јавна благодарност до полицајците Дарко Стајковски и  Филип Стојчевски од полициската станица Бутел, кои учествувале во гаснењето на пожарот.

Секоја чест момци. Ќе се потрудам овој чин да биде забележан од страна на општината со наградување на сите кои учествуваа во гасењето на овој високо заканувачки пожар, напиша Костовски на Фејсбук.

Вечерва Костовски објави дека повторно е подметнат пожар до градинката и училиштето.

До каде ќе оди лудоста !? Брзата реакција на полицијата и пожарникарите веднаш го локализираа новиот опасен пожар. Дефинитивно станува збор за подметнување со цел опожарување на новоизградената детска градинка.МВР силно работи на расветлување на случајот, ќе бидат поставени и целовечерни полициски патроли. На терен ќе биде и општинскиот кризен штаб – вели градоначалникот.