Сите ги загрижи веста која ја објавија некои словенечки и австриски медиуми, според кои хрватскиот скијач Ивица Костелиќ бил затрупан во лавина во австрискиот ски-центар Обертауерн.

Најдобриот хрватски скијач на сите времиња се огласи на социјалните мрежи и ја демантираше веста дека животот му е во опасност.

– Бев во базенот со децата кога добив чудна вест и сите беа навистина возбудени. Денеска бев директен очевидец на лавина во Австрија во која, според моите сознанија, нема повредени и како и секој граѓанин ги дадов своите податоци во постапката по ваков настан. Претпоставувам дека така заврши моето име во оваа вест – напиша Ивица Костелиќ на Фејсбук, заклучувајќи:

– Јас сум на скијање со семејството и би сакал да ги замолам сите медиуми да ја почитуваат мојата приватност и да не ме вознемируваат мене и моето семејство. Благодарам – стои во објавата на Хрватот.

Нешто подоцна тој се појави во Дневникот на Нова ТВ и ги демантираше обвинувањата.

– Не доживеав несреќа, бев очевидец на лавина што се случи овде денеска, колку што знам, никој не загина во таа лавина и тоа е сѐ – изјави Костелиќ.