Градоначалникот на Струмица, Костадин Костадинов вели дека е изненаден од одлуката на Владата, да не се одобрат пари за проектот со кој конкурирале – пазар во Струмица. Ова е една од четирите еопштии чии проекти беа одбиени, а парите доаѓаат од унгарскиот кредит.

Костадинов, во изјава за „Слободен печат“ потенцира дека цело време биле во комуникација со Министерството за локална самоуправа и со ресорното Министерство за транспорт и врски и дека била постигната согласност Струмица да конкурира само со еден проект, заради неговата големина – а тоа е новиот градски пазар најголем во регионот, што всушност беше и изборното ветување на ВМРО-ДПМНЕ.

Премиерот Христијан Мицкоски изјави дека Општина Струмица не доби затоа што конкурираше со проект којшто веќе е почнат и проект за кој веќе има избран изведувач.

-Никогаш до сега во критериумите не беше споменато дека проектот треба да биде нов. Овој проект е во посебна фаза на реализација и нормално е да сакавме да искористиме пари од кредитот за кој обврска за враќање имаат сите граѓани и граѓанки. Не само Владата. Од неофицијалната изјава на премиерот видовме дека ќе има нов рок до 15 ноември. Ние сме подготвени, веќе имаме изработено 30 проекти, ќе избереме неколку. Се надевам дека овој пат нема да бидат изневерени струмичани. Ние ги претставуваме интересите на сите наши сограѓани, не само на СДСМ – изјави Костадинов.

Повеќе од 270 проекти од речиси сите општини кои конкурирале на повикот за помош на единиците на локалната самоуправа се потврдени на владина седница неделава, изјави вчера премиерот Христијан Мицкоски.

-Ветената сума од 6 милијарди очекуваме до крајот на годината да биде испорачана, а веќе следната година ќе има 15 милијарди, што значи од централниот буџет кон општините ќе бидат испорачани проекти од околу 21 милијарда денари – рече Мицкоски.

Пари не им беа одобрени на Струмица, Теарце, Сарај и на Град Скопје.