Канцеларијата за Косово и Метохија на српската влада соопшти дека на семејството Ѓокиќ од косовското село Радево кај Липљан вчеравечер им биле запалени помошни објекти од куќата, каде складирале детелина, пченка и земјоделска механизација, при што е предизвикана значителна материјална штета и е загрозен животот на членовите на петчленото семејство.

Од Канцеларијата велат дела ќе му пружат помош на семејството кое се занимава со земјоделство, а во исто време бараат одлучна реакција од претставниците на меѓународната заедница на Косово за инцидентот.

Во соопштението на Канцеларијата се посочува дека „по којзнае кој пат празничните денови се искористени за да се испрати порака до српскиот народ во АП КиМ дека нема опуштање и дека Србите не можат да бидат мирни во ниту еден ден од годината“.

„Ова ниво на политички спонзорирана омраза и агресија не е забележано во Европа со децении и неверојатно е што, и покрај постојаната, секојдневна суровост, сè уште има такви во меѓународната заедница кои зборуваат за демократија и владеење на правото на Косово и Метохија“, се вели во соопштението.

Од Канцеларијата додаваат дека во уредно и мирно општество, работата на полицијата би била да ги спречи и расветли злосторствата од омраза, но дека во последните години ниту еден албански екстремист не бил осуден на пример за проповедање на омраза или за етнички мотивирани напади. Во соопштението се додава дека е сосема јасно дека „зад секој чин на насилство врз српскиот народ во АП КиМ стои идеологијата на омразата, чиј главен креатор и промотор е премиерот Аљбин Курти“.