Главните преговарачи на Косово и Србија, Бесник Бислими и Петар Петковиќ во Брисел не успеаја да најдат компромисно решение за користењето на српскиот динар на Косово. Специјалниот пратеник на Европската унија за дијалог, Мирослав Лајчак, во средата беше домаќин на седмата рунда состаноци со делегациите на Косово и Србија во Брисел, што се одржаа од 28 февруари до 15 мај, со цел да се најде одржливо привремено решение за луѓето кои се најпогодени од Регулативата на Централната банка на Косово за готовинското работење. Решението за користењето на динарот на Косово може да се постигне со компромис, објави АлЏезира Балканс.

„По седми пат бев домаќин на главните преговарачи на Косово и Србија за импликациите на Регулативата за ЦБК. За жал, страните не успеаја да постигнат договор“, напиша Лајчак на платформата Х. Портпаролот на Европската Унија, Петер Стано, во писмена изјава најави и дека страните не успеале да најдат компромисно решение за преостанатите отворени прашања. По истекот на тримесечниот период, кој Централната банка на Косово го одреди како „преоден период“, еврото и официјално е единственото средство за плаќање во готовина.

Во Косово, трговските и угостителските објекти во населбите со мнозинско српско население, во околината на Приштина, престанаа да наплаќаат стоки и услуги во динари, на што се противи официјален Белград.