Тоа што е договорено во 2022 година е договорено и сега треба да се испорача тоа што е договорено, нема друго, порача претседателот на Европскиот совет, Антонио Кошта на денешната заедничка прес-конференција со премиерот Христијан Мицкоски, јасно кажувајќи го ставот на Европската Унија во однос на евроинтегративниот процес на Македонија.

Кошта нагласи дека нема план Б, напротив, вели дека планот А не треба да се потцени. Го охрабри премиерот Мицкоски да ги вложи своите напори за да го овозможи натамошниот напредок на земјата.

„Не треба да го потценуваме планот А и мора да се фокусираме на исполнување на планот А. Знаеме кои се копенхашките критериуми и одлуките на Европскиот Совет и мора да го испорачаме тоа. Сфакам кога премиерот вели дека веќе е променето знамето, името на државата, направени се уставни измени, треба да бидеме сигурни дека сега нема да дојде некој и да бара нешто ново од претходно договореното“ рече Кошта.

Според претседателот на Европскиот совет, овој процес се одвива премногу долго и сега е време да се испорачаат резултати. Рече дека е постигнато многу досега и дека треба да се продолжи по истиот пат, нагласувајќи ја важноста од коридорите 8 и 10.

Се работи за конректни резултати на Република Северна Македонија. Треба да се надмине овој процес за пристапување, а за тоа треба да се исполнат одредени реформи и да се исполни она што беше договорено во 2022 година. Знам дека е тешко и ѝ честитам на Република Северна Македонија за огромните напори кои ги презеде во минатото за да се придвижи напред, во однос на пристапувањето кон ЕУ. Мицкоски знае дека може да смета на мене и на ЕУ за да го олесниме процесот. Тоа е причината зошто ја посетив Бугарија пред две недели. Јасно е дека она што е договорено е договорено, сега треба да го испорачано она што е договрено“ порача Кошта.