Комесарката за проширување Марта Кос, обраќајќи се пред европратениците, изјави дека е искрено посветена на пристапувањето на Србија во Европската Унија, но дека тоа бара од Србија да преземе конкретни чекори, пренесува Н1.

Коментирајќи ги граѓанските и студентските протести и полициската бруталност, Кос рече дека очекуваат полицијата и нејзините постапки да бидат пропорционални и дека основните права ќе се почитуваат.

„Ги осудуваме сите акти на омраза, вандализам и насилство и продолжуваме да ги повикуваме сите страни да ги намалат тензиите. Почитувањето на основните права и вредности, вклучувајќи ја слободата на мирно собирање, слободата на медиумите и академската слобода, се клучни елементи на европската интеграција и мора да се почитуваат насекаде и од сите страни“, рече таа.

Комисијата постојано ја нагласува важноста на почитувањето и проактивната одбрана на независноста на судството, додаде таа.

„Го осудуваме насилството или заканите врз претставниците на судството, вклучително и обвинителството“, рече Кос.

Комисијата, исто така, нагласува, продолжи Кос, дека ширењето на дезинформации и непријателска политичка реторика, вклучително и против Европската Унија и граѓаните на ЕУ, е спротивно на европските стандарди и вредности.

„Ќе продолжиме да бидеме конструктивни и ќе направиме сè за да ѝ помогнеме на Србија да продолжи напред на својот пат кон Европа, но за да се случи тоа, потребни се конкретни чекори по прашањето на реформите и демократските принципи. Учеството на претседателот Вучиќ на воените паради во Москва и Пекинг, придружено со некои критички изјави против Европската Унија и почитувани пратеници, неодамна на сметка на делегацијата на Европските зелени, едноставно не е она што се очекува од земја-кандидат“, нагласи Кос.

Искреноста на посветеноста на Србија кон европската интеграција и политичката волја за веродостојно спроведување на реформите мора да бидат поткрепени со конкретни мерки и активности, рече Кос.