Средба, комуникација, соработка меѓу власта и опозицијата, односно меѓу партиите мора да има и тотално неважно е кој е на власт, а кој во опозиција. Не можам да најдам разбирање зошто нема дијалог. Уценување и неприфаќање на дијалог е неприфатливо во демократијата, вели комуникологот Бојан Кордалов по одлуката на најголемата опозициска партија ВМРО-ДПМНЕ за блокада на Собранието.

-Блокадите на Собранието не постојат од сега, ние сме биле сведоци на читање поезија, чукање со тенџериња и илјадници амандмани од сите политички структури. Тоа е нешто стандардно во македонското политичко милје. Секоја блокада и одлука мора да има конкретна цел и нормално е опозицијата да прави притисок врз власта na сите легитимни начини, но во исто време мора да се стави во прв план интересот на граѓаните, односно потребите на граѓаните никогаш не смеат да бидат блокирани – вели Кордалов.

Тој додава дека во секоја нормална држава, а Македонија за него е нормална држава, земја којашто се наоѓа на европскиот континент, членка на најмоќниот воен сојуз НАТО Алијансата и аспирант за членство во ЕУ, е важен политичкиот дијалог којшто треба да биде континуиран процес, дел од политичката култура, а во фокус треба да ги стави приоритетите на граѓаните, а не партиските голи пресметки.

-Потенцирам, тие приоритети се економијата, повисоките плати, социјалната политика, квалитетно здравство и образование. Средба, комуникација, соработка меѓу власта и опозицијата, односно меѓу партиите мора да има и тотално неважно е кој е на власт, а кој во опозиција. Не можам да најдам разбирање зошто нема дијалог. Уценување и неприфаќање на дијалог е неприфатливо во демократијата – вели Кордалов.

Извршниот комитет на ВМРО-ДПМНЕ синоќа даде согласност за предлогот на лидерот  на партијата Христијан Мицкоски за активна блокада на Собранието.

Потпретседателот на партијата Александар Николоски изјави дека блокадата ќе стапи на сила на 10 мај и дека дотогаш власта има време да прифати лидерска средба на која ќе биде договорен датум за предвремени избори.

Премиерот Димитар Ковачевски претходно изјави дека одбива средби со Мицкоски кои се условени со датум за предвремени парламентарни избори.