Беким Ќоку ќе биде новиот координатор на пратеничката група на Вреди со која досега раководеше Халил Снопче од Алијанса за Албанците, предводена од Арбен Таравари, вели за „Слободен печат“ висок функционер на Вреди. Со тоа расколот во Вреди веќе се рефлектира и во Собранието и очекувањата се дека ќе се формира нова пратеничка група на АА на Таравари.

Засега нема информација кога Вреди и формално ќе го извести претседателот на Собранието Африм Гаши за промена на шефот на пратеничката група. Ќоку е независен пратеник од Самоопределување кој на изборите настапи со коалицијата Вреди, а по расколот остана во друшто на Изет Меџити, Билал Касами и Зеќирија Ибрахими.

Актуелниот координатор на Вреди, Снопче, вели дека тој уште е шеф на пратеничката група на Вреди и дека за каква било промена чекаат потег од доскорешните партнери на коалицијата.
Промената на координаторот на пратеничката група на Вреди следи откако вчера коалицијата најави мораториум на сите јавни политички активности на партиите што ја сочинуваат и соопшти дека отсега ќе делува како еден политички субјект, односно како партија. Претседателството што ја одржа првата средба е првиот заеднички орган на партијата Вреди. Според најавата на Касами, на следните средби ќе бидат конституирани и другите органи на раководството.

– Претседателството на Вреди е првиот заеднички орган. Отсега натаму, Вреди најавува мораторум на јавни политички активности на партиите што го сочинуваат и отсега натаму се ќе биде под името и логото на Вреди. На следните средби Вреди ќе ги конституира и другите органи на раководството како локалните штабови и централниот изборен штаб – рече Касами.

Тој напомена и дека парламентарната група на Вреди ќе продолжи со пратениците што ќе ја поддржат.
Снопче ни изјави дека тој е координатор.

– Во моментот кога ќе соберат девет потписи и за тоа ќе го информираат претседателот на Собранието дека предлагаат координатор, ќе има промени. Ние засега не поднесуваме барање за формирање на пратеничка група. Ако тие тоа го сторат, тогаш ќе доставиме барање за пратеничка група на Алијансата за Албанците – вели Снопче.

Од кабинетот на Гаши велат дека досега нема барање за формирање нова пратеничка група или за нов координатор.
Разидувањето во коалицијата Вреди се случи откако делот од Алијансата предводена од Таравари одлучи на претстојните локални избори да оди со свои советнички листи, што не беше прифатено од останатите коалициски партнери. По ова, Вреди го забрза процесот коалицијата да се трансформира во партија и на локалните избори Меџити, Касами, Ибрахими и Ќоку ќе настапат со заеднички советнички листи и заеднички кандидати за градоначалници, односно ако дотогаш ја регистрираат партијата, ќе настапат како Вреди.

Расколот во коалицијата предизвика турбуленции и во Владата и по средбата меѓу премиерот Христијан Мицкоски и Таравари по 1 Мај ќе се знае дали Алијансата останува владин партнер. И доскорешните коалициски партнери и владините партнери ВМРО-ДПМНЕ и ЗНАМ му порачаа на Таравари дека не му е местото во Владата, ако на локалните избори соработува со ДУИ на Али Ахмети.
Таравари, пак, порача дека органите на партијата одлучуваат за тоа со кого ќе соработуваат на локалните избори.

– Засега имаме сигурна одлука дека одиме со посебни советнички листи, тоа е одлука на партијата и од тоа нема враќање назад – рече Таравари.

За сè друго, вели Таравари, подготвени и отворени се да разговараат со сите други во однос на локалните избори.
По средбата Таравари – Мицкоски може ќе биде појасно и дали освен локални ќе има и предвремени парламентарни избори, карта на која игра опозициската ДУИ, но и Алијансата на Таравари ако излезе од Владата.
Според Снопче, предвремени парламентарни избори ќе бидат неизбежни ако тие излезат од Владата, бидејќи со само девет пратеници Албанци, мнозинството не ќе може да функционира.

– Без Албанци нема Влада. Ако одиме во опозиција, како мислите дека ќе функционира Владата ако нема нови Албанци во неа? Со девет пратеници Владата не може да функционира. Мора да се одржат предвремени избори, без оглед на тоа што јас или кој било друг ќе каже – вели Снопче за „Лајм“.

Или прелети на пратеници или предвремени парламентарни избори

Коалицијата Вреди брои 14 пратеници. Откако ќе се официјализира барањето за нов координатор на Вреди, пратеничката група ќе брои девет пратеници, додека Алијанса за Албанците ќе има пет пратеници.
Коалицијата го почна процесот на трансформација во партија Вреди со формирање на Претседателството кое вчера го одржа првиот состанок. Претседателството брои 23 членови, односно по седум од Демократското движење, Беса и Алтернатива и двајца од Самоопределување.