Романот на Салман Ружди од 1988 година, „Сатанските стихови“, поради кој на писателот му беше изречена фатва со закана по неговиот живот, принудувајќи го да се крие цела деценија, конечно се врати во книжарниците во Индија – родната земја на нејзиниот автор, пишува „Гардијан“.

Романот, инспириран од животот на пророкот Мухамед, стана жариште на жестока светска дебата за слободата на говорот кога тогашниот ирански лидер, Ајатолах Хомеини, ја прогласи книгата за богохулие и изрече фатва, односно наредба до секој верник да го убие Ружди поради она што го напишал. Книгата беше забранета во Индија од власта на Раџив Ганди во 1988 година, откако избија немири поради нејзината содржина.

Пред две години, долго откако Иран се дистанцираше од фатвата и Ружди престана да се крие, авторот беше критично повреден и го изгуби едното око кога беше прободен на настан во Њујорк. Напаѓачот, 26-годишниот Хади Матар, беше обвинет за обид за убиство од втор степен, а и за тероризам.

Но, повторното појавување на „Сатанските стихови“ во книжарниците не е поврзано со слободата на говор, туку со изгубени документи. Во лавиринтите на индиската бирократија, се изгубила оригиналната наредба за забрана на книгата, па поради тоа, забраната беше и поништена. Минатиот месец, Врховниот суд во Делхи соопшти: „Немаме друга опција освен да претпоставиме дека не постои такво известување“.