Македонскиот репрезентативец Елиф Елмас би можел да добие сосема нова задача во дресот на Наполи на утрешниот натпревар против Спортинг во Лигата на шампионите. Тренерот Антонио Конте не ја исклучува можноста  Елмас да се најде на позицијата десен бек каде што никогаш досега не играл во кариерата.

Конте се соочува со сериозни кадровски проблеми, особено во одбраната, каде повредите и суспензиите го принудуваат на креативни решенија. Спинацола и Оливера сè уште тренираат индивидуално и неизвесно е дали ќе бидат подготвени за утрешниот меч.

„Ќе ги чекаме до последен момент. Ако не бидат подготвени, ќе мора да бараме алтернативи. Дури и да сакам да ја сменам формацијата со петмина во последната линија, немам доволно централни дефанзивци. Една од опциите е Елмас да игра како десен бек, ќе видиме каква ќе биде ситуацијата утре“, изјави Конте на прес-конференцијата пред утрешниот натпревар.

Ќе потсетиме, Наполи во првото коло од најелитното европско натпреварување загуби од Манчестер сити со 2-0.

Преземено од: Спорт.ком.мк