Како што се ближи денот на гласањето – 8 мај, некои од партиите ја засилуваат националистичката реторика и наместо решенија за проблемите на граѓаните и како Македонија да го продолжи евроинтеграцискиот пат, главна тема е – да не се чепка „светињата УЧК“, дали ќе се процесуираат четирите хашки случаи, бадентер и балансер, дали само победниците кај Македонците и кај Албанците треба да прават влада итн. Како националистички се толкуваат и повиците за обезбедување 61 пратеник и слоганите „Македонија повторно твоја“ како и „Горда Македонија“.

Повеќе и не е важно кој ја затру со национализам претседателската и парламентрана кампања зашто секојдневно партиите меѓусебно се обвинуваат во надеж дека ќе прокнижат глас повеќе секој на своето конто.

Стефановски: Ја потценуваат интелигенцијата на граѓаните

Политичкиот аналитичар Милан Стефановски за „Слободен печат“ вели дека во вториот дел од кампањата воочлива е реториката која буди националистичка атмосфера. Тој додава дека политичката креативност, понуда и решенија, политичкото ниво и политичката интелигенција кај одредени политички партии не се на нивото за кое се протежираат. Во ниеден случај не се на нивото на ЕУ, и ја потценуваат интелигенцијата на граѓаните и на народот.

– Зачудува фактот дека доаѓа токму од партијата ДУИ, која во својот слоган користи порака „Не за Русија, да за ЕУ“. Јас навистина не знам како во ЕУ со извикот УЧК? Граѓаните очекуваат извици – колкава е просечната плата во Македонија, колку километри автопат се направени итн. Од друга страна, ВМРО ДПМНЕ како апсолутен победник на изборите чувствува потреба да одговори на оваа националистичка реторика, чувајки го приматот на партија која е заштитник на унитарниот карактер на државата. Во суштина, несфатлива е изјавата на Османи дека слоганот на ВМРО ДПМНЕ, „Македонија повторно твоја“ е шовинистичка. Македонија била и ќе биде на сите оние кои живеат во оваа држава, посебно на оние кои 20 години се на власт и се платени од даноците на граѓаните на оваа држава.
Слоганот „Македонија повторно твоја“ може да го иритира само оној кој навистина не ја чувствува како своја – смета Стефановски.

Според него, секоја политичка логика вели дека кога имате сериозна политичка конкуренција, а имате недостиг на реална политичка понуда кон гласачкиот електорат и по 20 години владеење, не ви останува ништо друго освен да скандирате за УЧК. Стефановски додава дека во политичката теорија, кога применувате стратегија за напад на политичкиот противник дека е националист и шовинист, тогаш треба да пресметате дека го јакнете рејтингот на опонентот кој го обвинувате во неговиот политички кампус.

Препукувања меѓу ДУИ и ВМРО-ДПМНЕ

Јавноста остана запрепастена кога неодамна среде Скопје лидерот на ДУИ Али Ахмети извикуваше УЧК, УЧК, зашто тој никогаш досега не си дозволи таков настап. И додека за „интегративците“ скандирањата УЧК и веењето на албанското знаме без државното не е национализам и провокација кон Македонците, оттаму редовно го обвинуваат ВМРО-ДПМНЕ за национализам, шовинизам и антиалбанство.

– Од Охридскиот договор произлегуваат две мнозинства, 61 како апсолутно мнозинство и мнозинство по Бадентер. Тоа обезбедува владина стабилност, но за жал некои го истакнуваат само мнозинството од 61 пратеник, и тоа е закана и за славното востание од 2001 година – порача портпаролот на ДУИ, Бујар Османи.

Тој се навреди од новинарско прашање што ќе се случи ако некој формира влада без ДУИ и праша дали треба да земе табла и да нацрта и повтори дека нема влада без Бадентерово мнозинство.

– Европскиот фронт е за соживот и европска интеграција, вториот концепт со слоганот „Македонија повторно горда“, е шовинистички, бидејќи, според тоа, Македонија не била горда со претставници Албанци. Вториот слоган „Твоја Македонија“ е исто така шовинистички, бидејќи произлегува дека била на Албанците – рече Османи и го повика обвинителството да се занимава со тие слогани како и со барањето за 61 македонски пратеник кое, според него, е шовинистичко барање во една мултиетничка средина.

Тој обвини дека, наспроти ВМРО-ДПМНЕ и нејзините сојузници кои секојдневно рециклираат националистички тези, флертуваат со проруски интереси и зголемуваат тензиите меѓу етничките и верските заедници во земјата, Фронтот е тој кој гарантира стабилност и соживот, обединувајќи ги сите заедници во мисијата за подобар и побогат живот во ЕУ.

Вицепремиерот Артан Груби пак, преку Фејсбук порача дека „Тирана денеска оддава почит на УЧК со прогласување на Али Ахмети за почесен граѓанин“ на албанската престолнина.

– Многу сум среќен за оваа заслужена награда за неодамнешното повторно раѓање на албанската нација во главниот град на Албанија. Поздрав од нас двајцата од срцето на Тирана – напиша Груби.

И лидерот на Демократско движење, Изет Меџити, во име на коалицијата „Вреди“ под прашалник ја доведе поддршката за претседателската кандидатка на ВМРО-ДПМНЕ Гордана Сиљановска-Давкова кога таа алудирајќи на воениот конфликт во 2001 година, рече дека некои дела, т.н. дела против човештвото, никогаш не застаруваат.
Ахмети, пак, ѝ одговоири на Давкова дека греши кога се обидува да „гребе по минатото и да отвора страници што не се отвораат“.

– Според кандидатката за претседател и како професорка по меѓународно право, Ослободителната народна армија (ОНА) треба да одговара затоа што ја извојувале слободата, борците на ОНА беа борци за слобода, а не платеници и дезертери, се изборија за своите права, потпишаа Меѓународен договор со НАТО, со ЕУ, со САД, потпишан и од тогашниот претседател Борис Трајковски и од мене како главен командант на ОНА – рече Ахмети.

Се јави и албанската дијаспора од Австрија

Се јави и албанската дијаспора од Австрија, поддржувачи на Европскиот фронт, со порака дека е подготвена да направи се што е потребно, „како во 2001 година, така и денес, за да се обезбеди мир и правда во нашата земја“.

„Дијаспората денеска со печат ја потврди својата подготвеност и не дозволува македонските националистички и опозициски партии да експериментираат против Албанците за да им служат само на нивните лични и индивидуални интереси“, велат од албанската дијаспора од Австрија.

Лидерот на ВМРО-ДПМНЕ Христијан Мицкоски од секој митинг и медиумско гостување порачува дека ДУИ нема да биде дел од новата влада.

– Секогаш кога ќе ја кажеме вистината за ДУИ, дека тие грубо ја злоуотребуваат судбината, пред се, на Албанците, и нивната мака, за да се богатат и крадат, кажувањето на таа вистина од ДУИ ја толкуваат како напад врз Албанците. Така, Бујар Османи ќе обвини дека слоганот „Македонија повторно твоја“ бил шовинистички слоган. Тоа може само да го каже неук човек кој е вистински шовинист и кој Македонија не ја чуствува за своја татковина, затоа што јас кога ќе кажам Македонија, мислам на сите граѓани кои живеат во неа. Мојата борба е Македонија да ја вратиме на народот – вели Мицкоски.

Стојанче Ангелов, пак, ѝ се налути на министерката за одбрана, Славјанка Петровска и за него крајно несериозна и неодговорна е изјавата со која тврди дека бранителите во заседата кај Вејце загинале затоа што ВМРО ДПМНЕ во 2001 година, но и денес, посакувало војна.

– Војната во 2001 ја почна т.н. ОНА или УЧК, која во своето коминике број 4 јасно кажа дека нивна цел е ослободување на вековните албански огништа од славомакедонскиот окупатор. Впрочем, и тогашниот генерален секретар на НАТО Џорџ Робертсон најдобро опиша со кого си имаме работа, дефиниријќи ги УЧК како убијци и разбојници. Значи, министерке Петровска, не ВМРО-ДПМНЕ, туку Али Ахмети и УЧК почнаа долго и внимателно подготвувана војна за да отцепат дел од македонската територија – напиша Ангелов на Фејсбук.

И СДСМ го осуди скандирањето на Ахмети од центарот на Скопје и речиси сите функционери предупредуваат да не се шири националистичка реторика.

– Али Ахмети прави голема грешка со скандирањата УЧК на предизборните митинзи на ДУИ. Тој знае дека тие скандирања никому не носат добро и единствено што може да направат е разгорување меѓуетничка нетрпеливост во државата – порача лидерот на СДСМ Димитар Ковачевски.

Тој го повика Ахмети да се воздржи од реторика која не е соодветна за актуелната сегашност, во која Македонија се стреми кон Европската Унија.