Борис Кондарко од СДСМ и официјално е предложен за нов претседател на Државната изборна комисија (ДИК) додека за потпретседател е предложен актуелниот член Абдуш Демири од Беса. Неофицијално дознаваме дека Ангелчо Ристов вработен во службите на ДИК ќе биде предлог на ВМРО-ДПМНЕ за нов член. Од владејачката партија засега не откриваат кој ќе биде вториот предлог.

По изборите, власта и опозицијата си ги сменија местата, по што Собранието донесе одлука за усогласување на составот на ДИК. Досегашниот претседател на ДИК Александар Даштевски од ВМРО-ДПМНЕ сега е предложен за член на ДИК, а во Комисијата како членови остануваат и Оливер Ристовски од СДСМ и досегашната потпретседателка Дитмире Шеху од ДУИ, но сега како член.

Собранието распиша оглас за доекипирање на ДИК, со кој ќе врши избор на два члена на ДИК. Според Изборниот законик, ВМРО-ДПМНЕ како победничка партија на изборите во Комисијата, треба да биде застапена со три члена, СДСМ со претседател и еден член, а по еден член имаат владејачката и опозициската партија од албанскиот политички блок, односно коалицијата Вреди и Европскиот фронт. Треба да се пополнат две места со членови на ДИК на предлог на ВМРО-ДПМНЕ. Кога одлуката ќе стапи на сила, пред истекот ѝ престанува мандатот на членот на ДИК Радица Ристеска од СДСМ.

Кондарко ќе седне на фотелјата на Даштевски во ДИК

Според Изборниот законик, во случај на промена на политичките партии во опозиција или политичките партии на власт, Собранието го усогласува составот на ДИК, и тоа партиите што преминале од власт во опозиција на Собранието му доставуваат предлог за претседател на ДИК од членовите во постојниот состав (во случајов Борис Кондарко од СДСМ) и предлог за престанок на функција пред истекот на мандатот на еден од членовите предложен од нив (во случајов Радица Ристевска од СДСМ). Партиите што преминале од опозиција на власт, на Собранието му доставуваат предлог за потпретседател на ДИК од членови од постојниот состав, (во случајов Абдуш Демири од Беса) и еден член, за што Собранието го огласува изборот на еден член на ДИК. Откако членот на ДИК, предложен од ВМРО-ДПМНЕ, Бобан Стојаноски, беше избран за заменик-генерален секретар на Собранието, остана едно празно место во ДИК, кое треба да биде пополнето на предлог на владејачката партија.
Претседателот, потпретседателот и член на ДИК, Собранието го избира со двотретинско мнозинство.

Во процедура и Комисијата за правична застапеност

Речиси три месеца по договорот помеѓу премиерот Христијан Мицкоски и лидерот на ДУИ Али Ахмети, во собраниска процедура конечно влезе и екипирањето ад хок Комисијата за следење на соодветната и правична застапеност на граѓаните што припаѓаат на сите заедници. Комисијата ќе ја предводи експретседателот на Собранието Талат Џафери, а потпретседател ќе биде Муса Џафери.

Оваа привилегија ДУИ ја доби откако Ахмети му обезбеди двотретинско мнозинство на Мицкоски за Законот за реорганизација на Владата.
За членови на Комисијата се предложени Ѓорѓија Сајкоски, Дафина Стојаноска, Антонијо Милошоски, Александар Велјановски, Драган Ковачки, Драган Недељковиќ, Салим Сулејмани, Илир Демири, Сали Мурати, Миле Цеков,Фатмир Битиќи и Соња Мираковска.