Концерт на оркестарот на „Танец“ по повод 80 години од основањето на МРТ, 75 години од основањето на „Танец“ и Народниот оркестар на МРТ и 70 години од раѓањето на Тодор Трајчевски е на програмата на фестивалот „Денови на македонска музика“ на 3 април, во 20 часот, во малата сала на НУ Филхармонија.

Со наслов „Од архивите на МРТ“ станува збор за концерт кој во себе обединува неколку јубилеи – 80 години од основањето на МРТ, 75 години од основањето на „Танец“ и на Народниот оркестар на МРТ, како и 70 години од раѓањето на Тодор Трајчевски, член на СОКОМ и автор, инструменталист и раководител на Народниот оркестар на МРТ.

– Всушност, самиот наслов ја открива содржината на овој ексклузивен настан, со кој оркестарот на „Танец“, раководен од Дарко Илиевски ќе возобнови дел од богатата архива на МРТ, односно ќе отсвири партитури кои се неотуѓив дел од македонското наследство, композиции од врвните мајстори кои создавале за Народниот оркестар за време на неговото постоење – истакнуваат од СОКОМ.

Концертот ќе започне со кус пригоден разговор со Благоја Десковски, последниот раководител на Народниот оркестар, а потоа ќе биде изведена целовечерна програма составена од композиции од најзначајните автори на аранжмани и композиции за Народниот оркестар и тоа од речиси сите периоди на постоењето на оркестарот.

Воведниот разговор со маестро Благоја Десковски ќе го води музикологот Бранка Костиќ-Марковиќ. На програмата се делата „Брегалнички бисери“, „Скопско оро“, „Битолско оро“, „Ситна лиса“, „Соборско оро“, „Десково оро“, „Фолклорен јазол“, „Бојанино оро“, „Тинино оро“, „Пајдушка игра“, „Повардарско оро“ и „Тинина приказна“ од авторите на аранжмани и композиции Никола Галевски, Ангел Нанчевски, Тале Огненовски, Пеце Атанасовски, Кочо Петровски, Благоја Десковски, Петар Лукиќ, Илчо Јованов и Тодор Трајчевски.

Архивата на МРТ е непроценлив извор на снимки, партитури и факти за развојот на македонската музичка култура, но и на македонската културна историја во целост. Архивата и фонотеката на МРТ се најстари во државата и претставуваат вистинско национално богатство. Голем дел од драгоцените архивски материјали се произведени од ансамблите кои долги години делуваа во рамките на телевизијата, а тоа се: Големиот народен оркестар, Оркестарот на народни инструменти, Чалгискиот оркестар, Камерниот оркестар, Радио хорот, Детскиот хор и Биг-бендот.

Предистражувањето во архивите на МРТ го направија Бранка Костиќ-Марковиќ и Мери Попова, а изборот, адаптацијата и подготовката на композициите ги направи Дарко Илиевски, во консултации со Благоја Десковски. Влезот на концертот е слободен.