Од јавното претпријатие „Комунална хигиена – Скопје“, велат членови на Управниот одбор на претпријатието, кои доаѓаат од редовите на ВМРО-ДПМНЕ, им ги кочат предлозите за набавка на нови комунални возила и го кршат Деловникот со одржување на тајни седници. Со тоа од Комунална се обидуваат да одговорат на прозивките од јавноста, кои се однесуваат на нередовното собирање на смет од контејнерите.

Изминативе неколку месеци во Скопје се поактуелен е проблемот со комуналниот отпад кој никнува на секое ќоше од секоја општина, на булеварите, улиците, тротоарите и зелените површини, со што постојано на удар е јавното претпријатие „Комунална хигиена“ при Град Скопје.

Претпријатието ја има сета надлежност за собирање на отпадот низ главниот град, вклучувајќи ги сите општини и нивните слепи и тесни улички со своите индивидуални канти за отпад, озгора на комуналните големи контејнери што се поставени на централни локации во населбите и на главните улици.

Сепак, претходните неколку месеци работата на Комунална е јавно оспорувана и осудувана од страна на граѓаните, општините, градоначалниците, односно целата јавност.

Иако во мандатот на градоначалничката Данела Арсовска, таа повеќепати менуваше директори на јавните претпријатија, промени од кои не „остана покусо“ ни комуналното претпријатие, каде што директор се менуваше четирипати.

Оттаму постојано за „Слободен печат“ тврдеа дека работата си ја извршуваат доследно според предвидениот план, според кој одреден број пати во неделата го собираат отпадот од контејнерите и корпите за отпадоци ширум градот, некаде почесто, а некаде поретко.

Комунална: За чистење на депонијата кај Железничка е надлежна Општината, нашите обврски се исполнети

Во контејнерите се фрла несоодветен отпад

Исто така, на овој проблем со нередовното собирање на отпадот ниту малку не помогнаа дел од граѓаните, кои за право си земаа, а за жал и уште го практикуваат овој принцип, да депонираат секаков тип на отпад во комуналните контејнери, каде што не му е местото за фрлање.

Од електронски, градежен, органски отпад како скапани овошја и зеленчук, па се до кабаст отпад, кој е меѓу најобемните – фотелји, двоседи, троседи, спални, а на некои локации имаше и веце школки.

Дел од Општините, донекаде и како синхронизирани, организираа и акции за собирање на кабастиот отпад, кои и не поминаа баш популарно според жителите на нивните населби бидејќи резултираа со создавање на планини кабасто ѓубре кое со недели си се таложеше пред да дојде општинското камионче или возило на договорениот постапувач да ги ослободи населбите од овие минидепонии.

„Слободен печат“ постојано ја следи ситуацијата со отпадот во Скопје и ги објавува сите минидепонии и ѓубришта што ни ги испраќаат граѓаните од секоја скопска населба, а со тоа неизбежно е постојано да бараме одговори од ЈП „Комунална хигиена – Скопје“ за тоа каде лежи проблемот и зошто Скопје „тоне“ во ѓубришта.

Оттаму некогаш добивавме одговор, а некогаш не, а оние инстанции кога одговараа од Комунална, обично тоа се состоеше од префрлање на одговорноста за несобраното ѓубре од локациите кои ги посочуваме кон локалните самоуправи кои не постапиле во рамки на нивните предвидени надлежности, а од Општините како бумеранг повторно прстот го вперуваа во Градот и неговите претпријатија, и така настана еден постојан „магичен круг“.

Потребни се повеќе возила

Од Комунална за „Слободен печат“ последно информираа дека и покрај моменталниот возен парк од 86 специјализирани возила за собирање комунален отпад со кои располагаат, а според количината на ѓубре низ Скопје овој период, на претпријатието веројатно му се потребни повеќе возила за пообемно извршување на нивната обврска и поефективно собирање на отпадот.

Оттаму обвинија дека Управниот одбор на претпријатието не прифатил ниту еден од предлозите за набавка на нови специјализирани комунални возила и токму поради тоа тие оваа година ќе продолжат да го собираат ѓубрето со истиот број возила.

– ЈП Комунална хигиена – Скопје во моментов располага со 86 исправни специјални комунални возила наменети за собирање на отпадот. Возилата се со различна година на производство. Управниот одбор на претпријатието изгласан од советниците на ВМРО-ДПМНЕ, за жал повторно не ги одобри предложените набавки на специјални комунални возила во Планот за јавни набавки за 2025 година. Од овие причини, ЈП Комунална хигиена – Скопје во текот на 2025 година нема да биде во можност да реализира вакви набавки – велат од Комунална за „Слободен печат“.

Исто така, на оваа тема пред неколку денови се огласи и Арсовска, која преку социјалните мрежи ја обвини претседателката на Управниот одбор на „Комунална хигиена – Скопје“, Јулијана Спировска од редовите на ВМРО-ДПМНЕ, како одговорна за хаосот со собирањето на комуналниот отпад во Скопје и ја обвини дека закажала тајна седница на Управен одбор, која според законот треба да е јавна.

– Ако се прашувате зошто со месеци и години има проблеми со собирање на комуналниот отпад во Скопје, одговорот е поради Јулијана Спировска, претседател на управниот одбор на „Комунална хигиена. На госпоѓата работите никако да ѝ тргнат од рака и да ги тера по пропис, па закажала тајна затворена седница на УО. Согласно правните акти и член 3 од Деловникот според кои ти си должна да работиш, седниците на Управниот одбор на JП КХС се ЈАВНИ – објави градоначалничката.

Таа додаде дека според деловникот, седниците на УО на Комунална можат да ги следат и претставници на средствата за јавно информирање со цел да ја известуваат јавноста за работат.

Арсовска посочи дека претседателката на Управниот одбор исто така не ги следела протоколите со тоа што не ги доставила материјалите за седницата до раководните функции на претпријатието.

– Директно го кршиш член 13 и 14 со тоа што Предлогот на дневниот ред треба да го утврдиш во соработка со директорот на JП КХС и со тоа што материјалот со поканата за седницата на Управниот одбор не ги доставуваш на директорот, заменикот и раководните работници со посебни овластувања и одговорности, зошто сакаш во јавно претпријатие да тераш тајни седници, за да го доупропастиш претпријатието со кое управуваш – напиша Арсовска.

Од претпријатието исто така се пожалија дека во изминатите години, општините „немаат слух“ за соработка со „Комунална“ во насока на заедничко собирање на комуналниот отпад.

– За жал, во последните неколку години не наидуваме на расположение кај општинските власти за конструктивна и продуктивна соработка во сферата на одржувањето на јавната хигиена и управувањето со комуналниот отпад – велат од „Комунална“.

Иако постои со децении, комуналното претпријатие како никогаш се соочува со проблеми во работењето, а воедно и со управителите. Отпад има насекаде, дел одговорност и на несовесните граѓани, но примарната одговорност ја сноси „Комунална“ бидејќи некои делови од градот со недели, ако не и месеци секојдневно се жалат за несобрани ѓубриња и разлевање на отпадот по нивните улици и влезни врати.

Од Општините, пак, неколкупати се пофалија како на своја рака го собираат отпадот на својата територија, што значи дека и тие имаат услови и капацитет да помогнат во чистењето на Скопје, кое со месеци никако не може да се ослободи од количините ѓубре што ги задушува сите граѓани.

ФОТО | Конечно исчистена „планината“ од кабаст отпад во Припор