Комплет за прва помош за домашни миленици: Што мора да имате дома за итни случаи?
Никој не сака да замислува итна ситуација со своето куче или мачка, но вистината е дека незгоди се случуваат. Пад, исеченица или алергиска реакција – тоа се моменти кога времето игра клучна улога. Во тие случаи не помага паника, туку подготвеност, и токму затоа ветеринарите советуваат во секој дом со миленик да постои комплет за прва помош, пишува „Љубимци“.
Препорачано
Основата на комплетот за прва помош
Прво и најважно – телефонските броеви. Иако звучи банално, во хаотична ситуација многу значи да ги имате запишано контактите од ветеринарот, дежурната служба и итната линија за труење. Така не се губи време на пребарување. Добро е и да се чува копија од здравствениот картон на миленикот со податоци за вакцини, терапии и алергии.
Следува опремата: стерилни гази, еластични и самолепливи завои, ножици со заоблен врв и пинцета. Со нив може да се запре крварење, да се заштити рана или да се извади трн пред да се стигне во амбуланта. Неизоставни се и ракавиците за еднократна употреба – за заштита и на сопственикот и на миленикот.
Корисни додатоци за итни случаи
- Дигитален термометар – високата или ниската температура често е прв знак на сериозен проблем.
- Средства за чистење рани – физиолошки раствор или ветеринарен антисептик ја намалуваат опасноста од инфекција.
- Прав за застанување крварење – особено практичен кај кучиња кои лесно кршат нокти.
- Шприц без игла – за испирање рани или давање течности.
- Капки за очи – корисни ако миленикот влезе во прашина или му се иритираат очите.
- Пробиотици – помагаат при стомачни проблеми додека се стигне до ветеринар.
Кога миленикот не може сам?
Доколку кучето или мачката се повредени и не можат да се движат, корисно е да имате рампа, големо ќебе или пешкир со кој внимателно може да се пренесат без дополнителни повреди. Во некои случаи помага и заштитната крагна, која спречува миленикот да ја лиже раната на пат кон ординација.
Зошто е важен комплетот за прва помош?
Првата помош не значи дека сопственикот станува ветеринар, туку дека има можност да реагира во првите петнаесет минути – време кое често ја прави разликата меѓу лесно закрепнување и сериозни компликации. Комплетот не е луксуз, туку дел од одговорното сопствеништво. Треба редовно да се проверува, да се дополнува со недостасувачки работи и да се внимава на рокот на траење на средствата.
Најважно е да се задржи присебност – бидејќи ако несреќата не може да се спречи, сопственикот секогаш може да биде подготвен да му помогне на својот миленик тогаш кога му е најпотребно.
