Домашните компании да бидат максимално вклучени во проектите кои ќе се реализираат со помош на средствата од Договорот за стратешко партнерство со Обединетото Кралство. Раководството на Стопанската комора на Македонија по средбата со министерката за финансии Гордана Кочоска Димитриеска, порача дека домашниот бизнис сектор, треба да биде присутен со најмалку 70 отсто од извршувањето на работите во новите проекти и инвестиции што ќе ги договора Македонија со Обединетото Кралство во рамки на стратешкото партнерство.

Според претседателот на Комората Бранко Азески, компаниите се задоволни од работата на Владата иако има мислење дека некои од работите побавно се одвиваат.

– Моментно, во оваа исклучително проблематична геополитичка ситуација, мора превентивно да се делува за да одговориме на сите предизвици. Бараме враќање на солидарниот данок, тука мислам на одлуката на Уставниот суд, како и во предизборието повторно да се покрене процесот на децентрализација – истакна Азески.

Меѓу темите на состанокот била и предвидливоста, што е старо барање на СКСМ, а се однесува на фактот да не се носат закони преку ноќ, а во чија подготовка не е вклучена Комората. Ова дотолку повеќе што им пречи на плановите на компаниите кои не можат навреме да се подготват и да знаат како да се постават во однос на новите законски прописи.

Претходно премиерот Христијан Мицкоси повтори дека дел од тој проект е изградба на пруга којашто ќе ги поврзе Табановце со Гевгелија, реконструкција и модернизација на истата, завршување на Клиничкиот центар во Штип, заедно со зграда за Медицински факултет и студентски дом, изградба на Болницата во Кичево, заедно со здравствен дом и целосна реконструкција на Клиничката болница во Тетово.

Анреа Серафимовски, генерален директор на АД Гранит и претседател на Здружението за градежништво при СКСМ, вчера во разговор за ТВ Алфа, меѓудругото изјави дека инвестицитите во железницата и инвестициите во здравството се инвестиции во кои треба бескруплузно да се вложува, а Здружението иницира и инсистира на такви инвестиции. Според Серафимовски, кога се зема заем во олкав обем, а се најавуваат инвестиции тоа треба сите да не радува и треба да го поддржиме.

Владата најави дека ќе има вклученост на домашните компании и дека ќе се седне на иста маса заедно со стопанските комори.  Градежниците очекуваат вклученост на домашната оператива во реализација на проектите.

-Нас треба да ни е јасно дека со градежништвото градиме иднина, а не само проекти – рече Серафимоски.