Денеска заврши седумнеднавната жалост која ја прогласи Владата, но далеку од тоа дека Македонија ја надмина болката од загубата на 59 животи во дискотеката „Пулс“ во Кочани.

Од почит кон жртвите во трагедијата навивачите на Вардар информираа дека нема да присуствуваат на дербито со Пелистер кое е закажано за идниот викенд на 29. март.

„Во знак на почит кон жртвите на трагедијата во Кочани, како и во знак на солидарност кон сите преживеани и кон сите семејства погодени од големиот ужас, одлучивме дека нема да присуствуваме на следниот натпревар на ФК Вардар, кој ќе се одигра на 29.03.2025 во Битола, против екипата на Пелистер.

Сметаме дека во моменти кога народот тагува и жали, ова е единствената логична одлука која групата можеше да ја донесе.

Вардар во срцето, Македонија во душата!“, стои во објавата на „Комити“.

Ќе потсетиме, Пелистер претходно донесе одлука сите средства од овој натпревар да бидат донирани на семејствата настрадани во трагедијата.