Најтрофејниот македонски клуб ФК Вардар како што е веќе добро познато подолг период се бори со финаниски проблеми.

о изминатиот период зад Вардар застанаа неколку скопски општини, но јасно е дека тоа не може да биде доволно клубот нормално да функционира.

„Комитите“ од ден во ден се борат да обезбедат подобра иднина за „црвено-црните“, меѓутоа засега работите не одат како што треба. Со соопштение на својата Фејсбук страна се огласи еден од главните луѓе во навивачката група, Милорад Миленковски.

Миленковски е човекот кој ги застапува „Комитите“ на средбите со луѓето кои помагаа на Вардар, а сега го обвини актуелниот сопственик, Слободан Крстевски дека работи против интересите на клубот.

Соопштение на Миленковски ви го пренесуваме во целост:

Наместо убави моменти, кои според секоја логика требаше да ги доживуваме, а FK Vardar, нашата љубов да ги живее, започнува црно сценарио, во кое во главна улога е олигархијата, и темната страна на политиката, на терен претставена од најистурениот играч на непријателите на Вардар, “сопственикот” – Слободан Крстевски.

Тој во многу наврати си дозволи да не излаже нас, и стручниот штаб, и играчите, и секој еден поединец од сите делови на она што претставува Вардар, а паралелно со нас и јавноста.

ФК Вардар е ставен во многу незавидна ситуација од тие лаги, манипулации и измами со кои се служи овој човек, а покрај него и сите кои стојат позади него, во оваа специјална војна која му се случува на клубот.

Цобе ветува дека до Петок, ФК Вардар ќе поднесе Завршна сметка и Ревизорски Извештај до Лиценцната Комисија при Фудбалската Федерација на Македонија, за настап во првата лига, со цел да докаже дека барем еднаш ќе одигра за интересите на Вардар и сите ние кои сме вљубени во тоа свето име и Македонска Авангарда. Иако е клубот “негов” тој до сега ниту еднаш не направи ниту еден потег за да го покаже тоа на дело…Неверојатно но вистинито !?

Институциите, и надлежните органи не најдоа за сходно, барем до сега, да направат било каков чекор во правец на заштита на она што претставува Национално Богатство, Симбол и Клуб на Народот. А упатени беа безброј апели, од искрени побуди и со чистина невидена досега на нашата сцена. Тоа не беше доволно, за да се одбере народот наместо олигархијата, за жал.

Останува Вардар да се потпира само и единствено на „Комити“, останатите навивачи на Вардар, но и конечно народот и јавноста.

Оставени сме сами на себе, но ако сме одлучни оваа војна да ја истераме до крај, без притоа да го жалиме непријателот, а ниту себеси, уверен сум дека ќе доживееме Победа и сеопшт Народен Триумф, кој му е толку потребен на овој напатен народ, како за промена од секојдневието исполнето со порази и деморализација на сопствениот народ.

Ако го сакаме Вардар дајте сите да се избориме за него, без колебања и без пардон, затоа што ВАРДАР е МАКЕДОНИЈА ! Доколку тоа не го сториме, ќе не колнат нашите поколенија, затоа што не сме достојни да се нарекуваме родители и Слободни луѓе, ниту пак сме достојни да ја газиме оваа света земја Македонија. Нема да сме достојни да се нарекуваме Комити.