Комерцијална банка понуди 3.200 денари за акција на Стопанска банка – Битола. За 390.977 акции што се на продажба понудени се 20,34 милиони евра. Претходно Народната банка на Македонија даде согласност за 100 отсто преземање на капиталот на Стопанска банка Битола.

Комерцијална банка упати повик до акционерите на Стопанска банка Битола за преземање на сите обични акции на банката со право на глас.

Во Стопанска банка Битола акционерски пакет од над 5 отсто има само компанијата „Пелистерка“ и таа располага со 16,99 отсто.

„Според Глава 6 од Правилата за котација, известуваме дека Комерцијална банка АД издаде претходна согласност за стекнување капитален дел од 100 отсто од вкупниот број обични акции со право на глас издадени од Стопанска банка АД Битола. Истовремено, Комерцијална банка АД Скопје известува дека во согласност со Одлука донесена од Надзорниот одбор на Банката, во постапката на јавна објава на понуда за преземање на Стопанска банка АД Битола, цената на акциите што ќе биде понудена во понудата за преземање изнесува 3.200,00 денари за 1 (една) акција“, соопшти Комерцијална банка на својата веб-страница.