Повеќедецениското игнорирање на важната инфраструктура во источна Украина периодов се покажува како главна логистичка пречка за посериозно помагање на земјата од страна на ЕУ и Западот во моменти кога тоа е најпотребно.

Имено, недостатокот на инвестиции во патиштата и железницата во источна Европа е можеби еден од клучните проблеми со кои во моментов ЕУ и НАТО се соочуваат во однос на помагање на Украина со воена опрема, хуманитарна помош и сл. за одбрана на државата од Русија.

Проблемите со инфраструктурата им се очигледни на сите со години, бидејќи додека НАТО се шири на исток, инвестициите во патишта и железници стагнираат. И покрај ваквите стратешки потреби, ЕУ не планира никакво итно зголемување на инвестициите во ова поле, анализира Политико.

„Колку си по на исток, толку помалку инфраструктурата може да ја издржи тежината на американските, германските, британските и холандски тенкови, проблем се мостовите. Мора да покажеме дека можеме да се движиме брзо или побрзо од руската федерација во Сувалки процепот (мало тесно парче рамнина меѓу Полска и Литванија, и Русија и Белорусија кое ги поврзува балтичките членки на НАТО со остатокот од Алијансата) или во Романија,“ изјавува пензионираниот генерал и поранешен генерал на американската армија во Европа, Бен Хоџес.

Магазинот потсетува дека минатата година, официјален Брисел за инвестирање во инфраструктурни објекти, ЦЕФ, решил да одвои 1,7 милијарди евра за „воена мобилност“ иако првично за оваа намена биле побарани 6,5 милијарди евра.

Минатата недела ЕУ дипломатите се согласија да потрошат уште 340 милиони евра за овие потреби, меѓутоа за 22 главно мали проекти – речиси сите во Централна Европа. Како пример за овие потреби биле наведени подобрата железничка поврзаност меѓу Антверпен и Германија и за надградување на два аеродроми во Полска.

Како што пренесува магазинот, еден од функционерите што учествувале во разговорите рекол дека е договорено следните преговори за овие пари да бидат префрлени од септември, во мај годинава.

За критичарите, овие последни напори на ЕУ за финансиската помош за подобрување на патната инфраструктура во Европа се задоцнети и парите се далеку под потребното за подготвување на континентот за одговор од воени закани, или како што ќе каже романскиот европратеник Маријан-Жан Маринеску „парите се смешни“ и во споредба со стратешките потреби на Унијата.

Во меѓувреме европратеникот побара итно инвестирање во инфраструктирата наместо да се чека новиот буџет на ЦЕФ во 2028 година.