Претседателот на Хрватското професионално здружение за гас, Далибор Пудиќ, вели дека треба да се има предвид дека од 1 април вкупната цена на гасот се намалила за пет отсто и со оглед на ова, најавеното зголемување на овој енергенс би било значително помало од 25-те проценти за кои се зборува, објави Н1 Хрватска.

„Доколку се укинат владините субвенции, тогаш тоа би било такво зголемување“, вели Пудиќ. „Владата одреди цена која би била флуктуирачка, во однос на сегашните цени… Владата потроши околу 120 милиони евра за субвенции. Можеби треба да размислуваме да не даваме повеќе толку субвенции“, вели тој.

Од хрватската Влада за Н1 велат дека доколку немало субвенции од Владата, поскапувањето на овој енергенс би изнесувало околу 100 евра годишно. Пудиќ не очекува дека Европа може повторно да се дестабилизира поради изворите на енергија, како што тоа се случи во 2022 година.

„Но, сè додека давате субвенција, помалку ќе се внимава на штедењето. Ако цената е пониска, нема да има значителни заштеди. Тие средства би можеле да се пренасочат кон енергетска ефикасност, помош на сиромашните“, вели тој.