Велигден е верски празник кога многу семејства традиционално бојадисуваат и кршат велигденски јајца, каде што јајцата стануваат централен симбол на прославата. Децата, како и возрасните уживаат во традиционалното украсување на јајцата, притоа испробувајќи различни техники.

Покрај нивната симболична важност, јајцата се и исклучително хранлива намирница која може да има бројни здравствени придобивки доколку се консумираат умерено, пишува Светлана Чокороли, диететичар-нутриционист и автор на веб-страницата Нутриментор – Совети и помош во подобрувањето на квалитетот на вашата исхрана.

Јајцата содржат висококвалитетни протеини, есенцијални аминокиселини, витамини како што се Б12, рибофлавин и фолати, како и минерали како селен и фосфор. Жолчката од јајце е богата со здрави масти, вклучително и омега-3 масни киселини, кои се неопходни за нормално функционирање на телото.

Традиционално, постои загриженост во врска со внесот на јајца поради холестеролот што се наоѓа во жолчката. Меѓутоа, бројни истражувања покажаа дека умереното внесување јајца (едно до две јајца дневно) не го зголемува ризикот од кардиоваскуларни болести кај здрави луѓе. Студија од 2020 година која опфатила 177.000 луѓе од 50 земји, докажала дека поголемото консумирање јајца може да биде поврзано со помал ризик од срцеви болести.

За луѓето кои се занимаваат со фитнес и бодибилдинг, јајцата се незаменлив дел од исхраната, често во многу поголеми количини од вообичаеното. Богатството од висококвалитетни протеини и есенцијални аминокиселини ги прави јајцата идеален избор за градење и одржување на мускулната маса. Протеините се клучни за обнова и раст на мускулните влакна, што е особено важно по интензивни тренинзи.

Јајцата се исто така фантастичен избор за луѓето кои сакаат да ослабат. Тие обезбедуваат чувство на ситост, што може да помогне во контролата на телесната тежина.

За Велигден целото семејство може да се забавува и да ја покаже својата креативност, но секогаш треба да имате на ум со што ќе ги обоите јајцата. Постојат многу начини за боење на природен начин, со природни бои, треба да се избегнуваат хемиските бои, бидејќи може да дојде до контаминација на храната. Некои од природните начини за боење јајца се: кромид, цвекло, куркума, билки и лисја, оцртување на јајцата со восок и нивно боење во природни бои, декупаж со салфети и белка и слично.

Велигденските јајца, освен што симболизираат обнова и нови почетоци, се и моќна, хранлива намирница која го поддржува вашето здравје. Но, додека уживате во традицијата на кршење велигденски јајца, не заборавајте дека умереноста има клучна улога кога станува збор за нивното консумирање.