За Велигден најчесто се готват големи количини јајца, кои потоа се бојадисуваат и украсуваат. На првиот ден од празникот се јадат многу јајца, но многу и се оставаат во декоративните корпи на трпезата.

Па, логичното прашање е колку долго овие јајца можат да траат, а сепак да бидат безбедни за јадење?

Според Управата за храна и лекови, тврдо варените јајца можете да ги чувате во фрижидер до седум дена откако ќе се сварат.

Основното правило е дека јајцата треба да се чуваат во фрижидер по готвењето, а не во декоративни корпи на маса, како што често се практикува кај нас, па затоа има еден голем исклучок за кој треба да знаете – правилото за седум дена не важи за велигденските јајца ако јајцата се надвор од фрижидер повеќе од два часа.

Никогаш не треба да јадете варени јајца кои се оставени надвор од фрижидер повеќе од два часа, пишува „Саутерн ливинг“.

Доколку забележите сино-зелена боја на границата меѓу белката и жолчката на варено јајце, нема потреба да се грижите, бидејќи тоа е само знак дека јајцето е долго сварено, а не дека е расипано, а можете слободно да го јадете.

Ако Велигденските јајца ненадејно сте ги изладиле со ладна вода по готвењето, знајте дека на тој начин бактериите можат да навлезат во јајцето, а таквите јајца мора да ги изедете најдоцна во рок од два дена.

Значи, ако јајцата ги чувате на собна температура, јадете ги истиот ден или најдоцна следниот ден, додека оние кои цело време биле во фрижидер се безбедни за јадење до седум дена.