Наместо во продавниците, замрзнати цени да има во владините бифеа, предлага портпаролот на ВМРО-ДПМНЕ, Наум Стоилковски.

Убаво си ги пишува цените за дневното мени. Пред да се затрчаат за „лажни вести“ нека видат датумот, 12 октомври, извор СОЗР! Може да нема омлет со свинско, ама тука е порција омлет со пилешко! Народот се турка за корка леб, а Ковачевски, Груби, Бујар, Спасовски, Стани Цаци, си сркаат пилешка чорба за 60 денари, вртат на вилушка омлет со свинско за 65 денари. Може и сланина на скара за 110 или вешалица од свинско каре за 135 денари. Некој нека најде копан со ориз за 100 денари, грав со сланина за 150 денари, тост со свински врат 75 денари на друго место освен во влада за министрите – пишува Стоилковски на Фејсбук кој објави фотографија од ценовникот од ресторанот во Владата.

Тој додава дека по овие цени не може да се јаде во болница или студентски домови.

Со овие цени, доручек, ручек и вечера за функционери доаѓа околу 250 денари. Чорба за доручек, готвено за ручек, тост за вечера – пишува портпаролот на ВМРО-ДПМНЕ.

Премиерот Димитар Ковачевски минатата недела изјави дека замрзнувањето на цените на прехранбените производи и нивно намалување, преку обезбедување гарантирана цена, како и со владината одлука за допрецизирање на повластената стапка на ДДВ од 5 проценти за најголем дел од основните прехранбени производи е создадена солидна основа за да постигнеме инфлација од 5 проценти до крајот на годината. Ковачевски е уверен дека реална и остварлива.

Горан Трајковски, директор на Државниот пазарен инспекторат уште еднаш повтори дека граѓаните треба да бидат спокојни бидејќи ДДВ за основните прехранбени производи останува 5 отсто, а ДПИ е на терен и постојано врши надзор.

ДДВ-то си останува 5 отсто за основната храна и не смее да има поскапувања, туку само намалувања. Сите граѓани кои ќе забележат некакви изигрувања на владините одлуки тоа треба да го пријават кај нас – рече Трајковски.

Според Трајковски, целта на ДПИ не е да казнува, ама некои компании не им оставаат избор и мора да сносат санкции, бидејќи се обидуваат да ги изигруваат законите.

Брашното, сирењето, кашкавалот, но и фефероните и детската храна, станаа луксузна храна