Американската технолошка компанија „Епл“ загуби речиси 640 милијарди долари од пазарната вредност за три дена тргување на берзите, бидејќи најавата за трговска војна меѓу САД и Кина ги разниша нејзините акции, кои паднаа за вкупно 19 отсто. „Епл“ е многу ранлив на трговскиот конфликт меѓу Вашингтон и Пекинг бидејќи значителен дел од неговото производство се наоѓа во Кина, која се соочува со американски царини од 54 отсто, пишува CNBC. Компанијата има производство и во Индија, Виетнам и Тајланд, но овие земји се исто така погодени од реципрочните царини на Трамп.

Аналитичарите предвидуваат дека „Епл“ најверојатно ќе мора да ги зголеми цените на своите производи или да ги покрие дополнителните трошоци кога ќе стапат на сила новите тарифи, пренесува Танјуг. Експертот за банката „Барклис“ од Лондон, Тим Лонг, очекува дека производите на „Епл“ ќе поскапат или во спротивно заработката по акција на компанијата ќе се намали за дури 15 проценти. Експертите од швајцарската банка УБС проценуваат дека врвниот „ајфон“ на „Епл“, кој моментално се продава за 1.199 долари, може да се зголеми за околу 30 отсто или приближно 350 долари поради новите тарифи.

„Епл“ би можел да го промени и синџирот на снабдување, така што увозот на неговите производи во САД доаѓа од други земји со пониски царини, додава американскиот медиум.