Понудите „во последен момент“ треба внимателно да се проучат за да се заштитиме од ризикот да добиеме понеповолни услови, изјави Габриела Руменова, основач на бугарската платформа „Ние потрошувачите“.

Таа го насочи вниманието кон навидум атрактивните понуди на електронските платформи за „ласт минут“-сместување во различни хотели, каде што најчесто атрактивните цени важат само за еден од понудените периоди. Таму финтата е што најчесто се работи за датуми надвор од активната сезона, кога првично е поевтино, додава Руменова за БНТ.

Понудите „во последен момент“ се нудат и кога се приближуваат датумите кога некои соби најверојатно ќе останат непополнети. Тогаш целта е да се пласираат на пазарот, а секогаш тоа не е вистинскиот попуст на потенцијалните клиенти. Често, ваквите понуди се придружени и со часовници кои го одбројуваат времето до истекот на нивната важност, што има за цел да го притисне потрошувачот и да го ограничи да бара алтернативни понуди за споредба и размислување.

„Затоа, пред да ја искористиме таквата понуда, да провериме во истиот овој хотел како се цените во другите периоди, како и на други места каде што би престојувале во ова или во друго одморалиште. Тогаш може да оцениме дали предлогот е економски корисен за нас“, советува Руменова.

Важна карактеристика на „ласт минут“ понудите е и тоа што понекогаш пониската цена се постигнува со „кратење“ на некои од услугите во пакетот, за што последователно се бара дополнително плаќање. Затоа, потребно е внимателно да се прочитаат понудите, особено што е вклучено, а што не е вклучено во цената.