Во многу важен меч за пласман во осминафиналето, македонскиот и европски ракометен првак Вардар на домашен терен во СЦ „Јане Сандански“ со резултат 38:28 го совлада украинскиот Мотор Запорожје, а во прилог одеше и победата на Монпеље дома над Мешков (30:26) и недостижни пет бода на две кола до крајот на групната фаза пред Белорусите.

Убав почеток на натпреварот за Вардар, иако Шишкарев доби исклучување уште во третата минута, Вардар водеше со 2:1, а после и со 3:1 после погодокот на Горбок. Навивачите ја поздравија првата одбрана на младиот Кизиќ, а потоа и влегувањето на новото засилување Толедо кој поради повреда го пропушти првиот дел од сезоната.

Самите фанови препознаа дека Вардар е моментно во финансиски проблеми, но тие секогаш и добри и лоши моменти се со клубот, а играчите тоа го возвратија со нови два голови преку Шишкарев, од кои еден со цепелин за одлични 7:2 на семафорот во 10. минута од средбата.

Една сигурна одбрана предводена од Калараш, тоа резултираше со нови погодоци во нападот, Стоилов во 15. минута за првпат се запиша во листата на стрелците за 9:5, а првите одбрани на талентираниот голман Кизиќ мамеа аплаузи за уште поголема поддршка од трибините.

Следуваше пад во играта на Вардарци, а тоа го искористија гостите за три голови во низа и намалување на 11:10 и прв тајмаут на Алушовски.

Возвратија со иста мера играчите на Алушовски за повторно плус четири (14:10), а добрата игра додаде и со нова петта одбрана на Кизиќ на две и пол минути до крајот на првото полувреме. „Експлозија“ од радост на трибините и после првенецот на Толедо во ЛШ за Вардар и одлични 15:10.

Сигурен почеток и во вториот дел, до 38 минута нашиот шампион веќе имаше над 20 голови во украинскиот мрежа после реализираниот пенал на Чупиќ за 21:14. Веќе почнуваше да тоне Мотор Запорожје и се најавуваше петтата победа на Вардар сезонава.

Чупиќ редеше погодоци од пенал за 27:19 за нешто помалку од 15 минути на средбата, а радост донесе и младиот Кукуловски со првиот гол за 31:22. Почнаа и атрактивни потези, убава асистенција од Пелко за Дибиров и првпат двоцифрена предност од 34:24 што беше најава за славје и пласман во осминафиналето.

Лига на шампиони, 12. коло

Вардар-Мотор Запорожје 38:28 (16:11)

Вардар: Гогов, Кизиќ (7 одб.), Гедбан (4 одб., 1 сед.), Стоилов 3, Кукуловски 2, Димитриоски, Карапалевски 1, Сикошек Пелко 1, Скубе 8, Калараш 3, Чупиќ 6, Де Толедо 2, Дибиров 5, Горбок 5, Шишкарев 2, Горпишин.