Тројца вработени во болницата во Кратово добија кривични пријави поради тоа што, како што тврди МВР, учествувале во малверзација со платата на четврти вработен во државната здравствена установа.

„СВР Куманово поднесе кривична пријава против А.Ѓ.А.(53) од Кратово поради постоење основи на сомнение за сторено кривично дело „фалсификување службена исправа“ и против Г.М.(61) и Т.Д.(62), двајцата од Кратово, поради постоење основи на сомнение за кривично дело „злоупотреба на службена положба и овластување“. Првопријавената, вработена во Јавната здравствена установа Кратово, во периодот од 15.06. до 30.06.2024, кога била задолжена за евидентирање на вработените во книгата за рапорт на Итната медицинска помош Кратово, за шест смени во текот на јуни 2024 евидентирала еден вработен во книгата и покрај тоа што бил надвор од државата, со што му овозможила за тој месец да прими цела плата и на тој начин го оштетила Буџетот на Здравствениот дом Кратово. Второ и третопријавениот, исто така, вработени во Јавната здравствена установа Кратово, иако биле должни да го известат директорот, не го сториле тоа“, пишува во полицискиот билтен.