Ретко, прво издание на книгата „Harry Potter“, купена за 30 пени, се продала на аукција за 10.500 фунти, пишува „Би-би-си“.

Изданието „The Philosopher’s Stone“, едно од 500-те копии, првично било купено од колекционер од Стафордшир кој починал на почетокот на оваа година. Книгата завршила во складиште за време на преселба на куќата, а неговата сестра изјвила дека се плашеле дека е изгубена.

Победничката понуда за книгата била добиена на интернет од купувач од Лос Анџелес, изјавиле од аукциската куќа „Ричард Винтертон“ во Личфилд.

„Ние сме апсолутно воодушевени од овој резултат“, додале аукционерите.

Книгата, објавена во 1997 година, била една од 300-те испратени во библиотеките и била купена во библиотеката Вулверхемптон од страна на човек кој живеел во Бурнтвуд.

Неговото семејство знаело дека тој набавил вредна книга за Хари Потер, но мислеле дека исчезнала. Кога се преселил пред четири години, сите негови книги биле складирани во „стотина кутии“, изјавила неговата сестра, која побарала да остане анонимна.

„Знаевме дека ја има купено книгата, но ако го прашавте да ви каже каде е, немаше да знеа да одговори“, додаде таа. Таа рекла дека нејзиниот брат имал доживотна страст за книги од кога почнал да се занимава со нив на училиште.

Сопственикот починал неочекувано на 55-годишна возраст, а книгата на крајот била пронајдена од тим аукционери од „Ричард Винтертон“, кои ги пребарале неговите работи.