Претставувањето на книгата „Филмска објектологија“ од авторот Васил Михаил ќе се одржи на 12 декември, со почеток во 18 часот, во литературното кафуле „Метаноја“ во Скопје.

Настанот ќе се одвива низ дискусија помеѓу Коста Милков од Балканскиот институт за вера и култура со авторот на книгата, Васил Михаил. Кон темата Милков ќе пристапи со теолошка херменевтика, сосредоточувајќи се на сакралните објекти во црковниот простор.

Насловот на настанот е „Објектот како парадигма: Објектологијата во кинематографијата и еклесиологијата.“

„Филмската објектологија“, како што ја дефинира авторот Васил Михаил, е теорија која се фокусира на улогата на објектите во филмскиот уметнички израз. Објектите во кадарот стануваат визуелни носители на наративот трансформирани од секојдневни предмети во значења, пораки, приказни. Книгата „Филмска објектологија“ предлага нова перспектива за тоа како гледаме на објектите и нивната интеракција со луѓето.

Целта на ова предавање е да се прикаже како објектите во различни контексти можат да пренесат значајни емотивни и метафизички пораки, од филмскиот кадар до духовниот простор на храмот.